聞西──一不離二炒雞柳 因為三椒欖菜四季豆

近排城中其中一個熱門話題，當然係內地團逼爆紅磡土瓜灣事件。一批又一批內地團友排隊入餐廳食飯，除咗做成交通擠塞及行人通道受阻問題之外，記者仲發現每團用餐時間平均唔超過20分鐘，大家都以為佢哋係被迫食咁快，錯晒！記者訪問團友點解要咁趕？先發現原來係佢哋自己食得快。之後當局規定用膳時間最少要半個鐘，團友反而覺得浪費咗佢哋嘅時間！

所以重點唔係管理嘅問題，而係心態。多年來呢種平價團嘅存在，都係將遊客當「羊牯」，帶佢哋去紅磡土瓜灣一帶嘅山寨貨購物中心，斬到啲遊客一頸血，從而補貼成本。雖然話百貨配百客，但呢種模式嘅平價團，根本對旅客同社會都無乜好處。

我反而有興趣想知佢哋食咗啲乜，按記者查訪呢啲「光速餐」，包括有清炒椰菜、麻婆豆腐、梅菜扣肉、翠玉瓜雙椒炒雞柳、炸魚、鯪魚肉及蝦米湯等，並附上兩大盆白飯任裝，團友話味道一般般，其實做任何嘢只要有心去做，就一定會做得好。好似今期分享嘅「三椒欖菜四季豆炒雞柳」，本來只係一個平凡嘅家庭小菜，只要放啲心思就會有唔同嘅效果！所謂三椒包括：醃肉嘅青花椒油、一串串嘅新鮮青胡椒及大紅辣椒，以上三樣加埋會令個餸更加惹味香噴噴。四季豆一定要做「去絲」步驟，食嘅時候先會無渣，先從豆嘅一邊摺下一小段，再順住豆莢方向將兩邊嘅粗纖維撕出嚟就得，留意比較鮮嫩嘅四季豆係冇「絲」㗎！

醃料：

鹽.................1/4茶匙

糖.................1/2茶匙

粟粉................1茶匙

紹酒................1茶匙

青花椒油.........2茶匙

調味料：

糖....................1茶匙

生抽................1湯匙

鹽.......................適量

材料：

去骨雞脾肉.........1塊

四季豆................半斤

大紅椒.................1隻

紫洋蔥................半個

新鮮青胡椒........幾串

欖菜醬.............2湯匙

蒜頭....................2粒

做法：

1. 將雞脾肉連皮切成條狀，落醃料醃15分鐘。四季豆去絲後切段，紫洋蔥及大紅椒切片，另外蒜頭切片備用。

2. 先將雞肉落鑊，以中火炒至轉白色盛起，隨即落四季豆半煎半炒至表面略帶金黃，落少少鹽調味後盛起。

3. 將欖菜醬、新鮮青胡椒及蒜片爆香，再加入雞肉及四季豆炒勻，然後落調味料。

4. 最後加入紫洋蔥及大紅椒片，轉大火炒15秒即可上碟。

【提提你】

新鮮青胡椒喺泰國雜貨舖有得賣，如果冇，用黑胡椒粉代替都可以。