聞西──優雅白湯金必多 煮好Like必多

全世界都知道香港係一個華洋共處中西合璧嘅地方，正因為咁，我哋有好多廣東話詞彙都係由英文直接譯成，例如的士（Taxi）、貼士（Tips）等等。唔講可能唔知，有啲餸名都係由英文直譯廣東話，不過完全估唔到佢係乜東東，今日就同大家分享幾個得意有趣嘅舊餸名。

第一個係「什菓咯嗲」，咯嗲原來係英文「cocktail」嘅譯音，什菓咯嗲即係我哋好熟識嘅雜果沙律。不過，以前嘅餐廳會用蛋黃醬及番茄醬嚟調製沙律汁，同宜家嘅雜果沙律味道係唔同㗎。第二個「焗意粉區加甸」，呢個係來自法國嘅菜式，「au gratin」係法文譯英文，再譯做廣東話「區加甸」。其實只係用芝士粉及麵包糠，放喺意粉或者薯蓉上面烤焗嘅菜式，簡單啲形容就係芝士麵包糠焗意粉囉！

最後一個，係有個好貴氣嘅名叫「金必多濃湯」。相傳源自清朝末年，當時上海嘅西餐廳流行一道叫「Comprador Soup」嘅中西合璧濃湯，唔使多講嚟到香港就多咗個好好意頭嘅名「金必多」，亦有人調返轉叫佢做（Million Dollar Soup），真係好符合香港搵錢至上嘅精神！佢係用忌廉濃湯再加入魚翅、西式火腿及鮑魚絲等名貴食材而成，今日我哋嘗試還原呢個湯水，不過用咗龍蝦代替魚翅，唔好睇啲材料咁簡單以為好容易，淨係切絲都要好畀心機，出嚟嘅成品先會優雅好看。

材料：

龍蝦尾.............2隻

洋蔥.................120g

甘筍.................20g

西芹.................120g

火腿.................120g

上湯.................500ml

清水.................500ml

牛油.................25g（兩份）

普通麵粉..........50g

淡奶.................100ml

龍蝦油..............適量

做法：

1. 洋蔥、甘筍及火腿全部切絲、西芹要先刨去外皮。然後折斷抽出纖維絲（食落先唔會有渣），再切條並用斜刀切成幼絲。

2. 急凍龍蝦尾解凍，去殼後沖洗乾淨，用廚紙抹乾後切成片。落鑊用25g牛油炒香盛起（唔好全熟），又或者可以灼熟之後切片。

3. 細火落25g牛油煮溶，轉中火落洋蔥、甘筍及西芹絲炒至軟身，加入麵粉炒至順滑，倒入雞湯及清水煮滾，轉細火煮15分鐘

4. 加入火腿絲及花奶再次煮滾，試味及以鹽調味，熄火才加入龍蝦肉，並𢳂適量湯落湯碟。最後，落少少龍蝦油便完成。