聞西──迷上雪燕鮮奶撻 等阿媽繼續白富美

就快到母親節，做人仔女嘅平日幾咁頂心駁嘴唔聽話都好，到咗呢日點都要做個乖仔乖女氹吓媽咪開心。據非正式統計，大部份媽咪都會口講話唔使搞咁多嘢、唔使嘥錢買禮物之類嘅說話，不過你哋千祈唔好信呀，如果你真係乜都冇準備，我相信你嚟緊嗰年都會好「難」過，哈哈！

要決定出街食嘅話，麻煩你哋要早少少訂定枱，唔好臨急抱佛腳，而且平日就要留意媽咪鍾意食啲乜嘢，亦都要考慮佢嘅身體健康情況，決定地點同食啲乜。當然，有啲媽咪會好堅持自己煮，咁你哋就順下佢意囉。不過各位仔女千祈唔好大安旨意夠鐘先出現喎，不妨可以陪媽咪去買餸，幫手拎嘢，主動入廚房幫手，順便陪佢傾下偈，佢一定會感受到你嘅心意㗎。

我認為仔女親手煮返餐畀媽咪食，就係最好嘅非物質禮物。今次同大家分享一個我專登為母親節諗嘅菜式：雪燕鮮奶撻。雪燕向來有平民燕窩之稱，質感都好似燕窩，而且有美白及補充骨膠原嘅效果，而大良炒鮮奶口感滑溜，奶味香濃，撻皮就用麵包做，成個擺盤就更加得意，簡單啲可以用西蘭花伴碟一樣咁靚！

材料：

鮮奶................150ml

蛋白.....3隻約100ml

粟粉................3茶匙

雪燕....................10g

雞湯................250ml

去皮白麪包........4片

帶子...................3粒

金箔（裝飾用）

做法：

1. 先準備撻皮，白麪包用麵粉棍壓扁，放入小蛋糕盤做成杯形（用手指壓實摺位）。之後放入200度預熱焗爐焗15分鐘，又或者將麵包放入細碗定形，然後炸至金黃備用。

2. 雪燕要預早一晚浸泡，本身會有少少酸味，用滾水煮5分鐘就可以去除。隔乾水之後放入雞湯煮10分鐘，落少少油及鹽調味，再隔去雞湯就處理完成，帶子切成幼粒炒熟備用。

3. 蛋白和牛奶拌勻，落1茶匙鹽和1湯匙糖調味，而粟粉就用少少牛奶開成漿，加入蛋白牛奶液拌勻，細火燒熱易潔鑊落油。倒入蛋白牛奶液之後，用鑊鏟慢慢將鍋底凝固咗嘅鮮奶蛋白推起，直至呈現布丁狀態。留意喎，千祈唔好大力炒，要慢慢用鑊鏟推，最後加入帶子粒稍為拌勻，就可以移到碗中。

4. 將適量牛奶蛋白放入撻皮一邊，然後再放適量雪燕，最後喺上面放上金箔裝飾就完成。如果冇金箔，可以用三文魚子、芫荽等做裝飾。

【提提你】

雪燕可以喺專賣菇菌嘅專門店買到，小小份量浸泡之後可以發大好幾十倍，可以嘅話就用北海道牛奶，奶味比一般牛奶香濃