聞西──大啖潮州豆醬雞 令我汁迷不悔

有時候，好多事都係一念之間。最近睇到一單令人好惋惜嘅新聞，話說元朗有間以即製新鮮牛丸聞名嘅潮州麵店，疑因凌晨打牛丸俾大廈業主法團多次投訴擾人清夢，後來引發有人涉嫌買兇殺人，最終演變成謀殺案收埸。如果當初可以平心靜氣坐低慢慢傾，個結局又會好唔同吧！

來不及打牛丸咪賣少啲囉，人哋都要瞓覺嘛！其實，潮州真係有個甜品叫「來不及」啊。相傳清末時，潮州有一大戶人家突然要喺家中設宴，家厨為此已盡量準備，不過阿Sir都係覺得唔夠餸好失禮，但又趕唔切再去街市買餸，一時間苦無對策。情急之下，家厨見到花園有棵掛滿香蕉嘅蕉樹，就靈機一觸出呢「招」：剝蕉皮之後切件沾上花生、芝麻及糖冬瓜等材料，最後沾上蛋漿炸脆。

客人試過都讚不絕口，勁讚外酥內嫩香甜可口，即刻問阿Sir個甜品叫咩名。阿Sir梗係唔知啦，於是叫家廚答，家廚就話來不及去買餸就求其煮啲嘢囉，客人聽到咁答就大笑，並且幫呢個甜品改名叫「來不及」！

今次介紹嘅菜式都同潮州有關，就係潮州豆醬雞，材料唔太複雜，煮嘅時間都唔算好耐，不過味道就無得頂啦！調味有潮州最出名嘅普寧豆醬，食魚飯嘅時候必不可少嘅沾醬，因為可以帶出魚肉嘅鮮味，不過味道偏鹹，所以要加啲帶甜嘅芝麻醬平衡一下，而且仲可以帶多份芝麻香味呢！煮呢個餸我會預備多少少汁，配個煎腸粉底就天下無敵啦！

材料：

冰鮮雞......半隻

腸粉...........5條

薑...........1小嚿

蒜頭...........2粒

蔥...............2棵

醃料：

芝麻醬...............3湯匙

普寧豆醬............2湯匙

蠔油...................2茶匙

生抽及老抽....各1茶匙

胡椒粉..................少許

調味：

紹酒......2

湯匙糖..........1茶匙

做法：

1. 普寧豆醬本身係有豆粒嘅，我習慣開封後用攪拌棒將成樽打成蓉，可以方便醃肉。雞洗乾淨用廚紙抹乾，放喺大盤中。

2. 戴上手套將醃料均勻塗滿雞皮及雞殼，慢慢幫佢按摩5分鐘就更容易入味。之後放室溫醃15分鐘，等待期間可以準備薑蔥蒜。

3. 先用慢火爆香薑蔥蒜，然後灒入紹酒，再加400ml水煮至滾，將雞放入去，而且記得雞皮要向下。另外，再將100ml水落個醃雞盤到，同餘下嘅醃料拌勻再倒埋入鑊，冚蓋慢火煮20分鐘。之後將雞反轉炆多15分鐘，唔夠水分可再加，熄火後夾起隻雞稍為攤凍。

4. 等待期間可以煎香腸粉，或者蒸熱都得，然後放入深碟中，將雞斬件放喺腸粉上面。最後，用生粉水將炆雞嘅汁，調教至自己喜歡嘅濃稠度，然後淋於雞件上面。