聞西──炒出粒粒誠意 潮州椒醬肉

消委會《選擇》月刊，最近提到收到市民投訴有啲食肆亂收費用個案，例如職員主動送上熱水，結帳果陣埋單發現有一項「中國茗茶水」收費$20蚊，亦有投訴人發現埋單時較電子餐牌顯示嘅價錢貴咗60蚊。平時出外食飯飲茶，埋單嘅時候我都好少會對單，無乜特別原因，都係怕麻煩之類。不過，前排同朋友食下午茶，埋單嘅時候朋友對單發現職員用咗午市價錢入單，原本$42嘅餐變成$49，換轉由我負責埋單，實俾餐廳收多咗錢都唔知呀！

最激氣就係睇到訪問啲飲食界人士，佢哋話呢啲隱藏收費係約定俗成喎。其實，酒樓菜館一向都會喺枱面放幾碟小食，例如鹹花生或者醬料，你唔好以為係免費㗎，呢啲都係一啲強迫性消費項目，不過都有例外嘅情況。記得去過一間潮洲菜館，同樣枱面都有碟小食，嗰碟叫椒醬肉，裡面有好多材料，包括豆乾、菜脯、肉粒等等，味道香香辣辣，咁有誠意嘅小食我就願意心甘情願畀錢喇！

潮州人食椒醬肉會以凍食為主，所以作為餐前小食都好合適，主要材料有菜脯、豬肉粒、豆乾、蝦乾、花生粒及青紅椒粒等等。菜脯煮前要先浸水以免過鹹，全部材料切成粒粒，配埋個非常惹味嘅醬汁，其實用嚟送粥或者送飯都好啱。今次我買咗即食包裝菜脯，味道已經調教過，即開即用。

材料：

五花腩肉或瘦肉.........150g

青紅燈籠椒.............各半個

五香豆腐乾..................3件

蝦米.............................1両

菜脯.............................2両

冬菇.............................2隻

蒜頭.............................3粒

豆豉.....................1大湯匙

新鮮辣椒或辣椒乾......數隻

水.............................100ml

麻油............................少許

調味料：

海鮮醬、豆瓣醬、蠔油及生抽各1湯匙

做法：

1. 蝦米及冬菇預先浸軟，蒜頭剁成蓉，辣椒乾切粒、豆豉用水沖洗，再用匙羹略略壓爛。冬菇、青、紅燈籠椒、五香豆腐乾全部切粒粒。

2. 五花腩肉切粒，落少少鹽略醃，燒熱鑊落油，將五花腩肉粒半煎炒至金黃。然後，加入蒜蓉、豆豉及辣椒炒香。

3. 加入蝦米及冬菇粒炒勻，隨後落調味料炒香，再加入五香豆腐乾炒。之後倒入100ml水慢火煮至收汁。

4. 加入青、紅燈籠椒及菜脯，撒少少麻油，轉大火炒多2分鐘即可熄火。鍾意嘅話落少少潮州辣椒油更加惹味，趁熱食之外，攤凍隔夜食就會再入味啲。