聞西──木瓜燉排骨酥湯 陪阿爸飲炸吓嬌

大家都知道炸物當然喺最香脆狀態下食為之最佳，之不過今次要介紹嘅木瓜燉排骨酥湯卻啱啱相反，炸到酥脆嘅排骨竟然放落湯裡面煮？有冇搞錯？當然冇搞錯啦，因為呢個正正係台式排骨酥嘅做法。

每次去台北，我都必定會去西門町「楊排骨酥麵」幫襯，呢碗排骨酥麵真係超級好味，食咗十幾廿年都唔會厭。雖然叫做排骨酥，其實炸到脆卜卜嘅排骨，係會連同蘿蔔及上湯放入燉盅燉到超腍，有客人點餐先會連同湯汁加入碗麵，咁排骨肉就軟綿綿喇。上面嗰層用蕃薯粉做嘅炸皮好滑溜，簡直唔使就可以直接滑入喉嚨一樣，而軟骨部份仍然保持脆身，當然吸盡精華嘅蘿蔔都同樣咁出色，湯頭偏甜十分濃郁。

雖則去台北機程分分鐘快過由屯門去觀塘，不過都唔夠自己煮咁快！今次將排骨酥化身成為靚湯，用咗青木瓜代替唔當造嘅白蘿蔔，再加埋鮮甜嘅蕃茄，湯頭入口清甜而不膩，係一個好清爽好夏天嘅湯水。記住，蕃薯粉要買粗粒嘅，咁樣炸好後先會有一層呈顆粒狀嘅鬆脆外皮。台式古早味五香粉係必不可少嘅調味料，比例就可以按個人口味自己調節喇。

材料：（二人份量）

帶軟骨腩排............200g

青木瓜半個約.........300g

薑............................3片

芫茜........................1棵

番薯粉....................適量

醃料：

雞蛋................半隻

生抽.............1湯匙

糖..............1/2茶匙

五香粉......1/4茶匙

胡椒粉......1/4茶匙

做法：

1. 排骨洗乾淨之後要用廚紙印乾水份，之後落醃料醃一個鐘，加蛋漿醃肉可以令肉質更鬆軟。

2. 將排骨多餘嘅醃料隔去。排骨上粉有兩個方法：一係將排骨放入密實袋，然後倒入適量蕃薯粉拌勻，另一方法將蕃薯粉倒落小碗，然後逐件排骨上粉。

3. 準備熱油鑊，將上好粉嘅排骨炸至金黃，留意唔需要全熟，因為之後會再煮。青木瓜及蕃茄切件，另準備芫茜碎。

4. 青木瓜、薑片及炸好嘅排骨放入煲內，加水至材料表面，大火煮至滾起，再冚蓋轉細火炆20分鐘。之後落蕃茄再煮10分鐘，最後以鹽調味及落芫茜碎即可。