聞西──黑啤燴牛肉 心服口服 暖胃舒服

小弟一向對批類食物情有獨鍾，無論酥皮或者牛油皮都無任歡迎，呢個喜好可能同我爺爺有關。話說小時候，屋企喺太平山街有間小小的印刷廠，一家人為口奔馳冇時停。當時爺爺美其名負責見客及送貨，其實正職係行街食嘢至真，仲係細路仔嘅我有時會做跟班，因為知道爺爺一定會帶我食好東西。

去得最多嘅就係中環蛇竇：樂香園咖啡室。蛇竇即係一衆打工仔忙裏偷閒嘅地方，印象中咩階層嘅人士都有，大家都係以輕食為主，充個電又繼續努力工作，快來又快去，而我同爺爺通常都係一杯飲品加件雞批或者雜批，有啲肥膩嘅牛油批皮配熱奶茶，就真係一絕！呢個都要多謝以前嚟香港做廚嘅英國人，將英國食批文化帶嚟香港，之後本地師傅就有樣學樣，先創造咗本地雞批出嚟。

今期分享嘅食譜靈感，係來自愛爾蘭嘅「健力士牛肉批」。呢個傳統愛爾蘭菜式，用咗當地最出名嘅黑啤燴牛肉及其他蔬菜，有時會做成批，又或者配薯蓉食，暖胃又飽肚，係最佳嘅禦寒食品。今次有啲取巧，用燜代替焗，現成嘅手抓餅扮批皮，而且餡料都有改動，加咗啲秋天元素，我揀咗蘑菇同栗子，加入麵粉可以令餸汁更濃稠，但會更容易燶底，要留意啊。順帶一提，啤酒廠會專登加個白色波波喺酒罐裡面，咁啤酒倒出嚟時候會充滿綿密嘅泡泡，千祈唔好以為罐啤酒壞咗，哈！

材料：

牛肋條...............1磅

栗子肉...............200g

啡蘑菇...............200g

黑啤...............1罐440ml

中洋蔥...............半個

香葉...............2片

黑胡椒粒.......一湯匙（可以唔加）

蒜頭...............2粒

麵粉............2大湯匙

茄膏............2大湯匙

雞湯................250ml

手抓餅........2至3片

做法：

1. 牛肋條洗乾淨，用廚紙印乾水份後切粗粒。買到大粒嘅啡蘑菇就將佢一開四，洋蔥就切件，準備好其他材料。

2. 鐵鍋中細火燒熱，落油及約25ml牛油，落牛肋條粒煎香，再落洋蔥、蒜蓉炒香。

3. 加入茄膏炒勻，再加入麵粉炒勻。隨後，加入黑啤酒、啡蘑菇、栗子、雞湯、香葉及黑胡椒粒，滾起後冚蓋轉細火燜一個半鐘。期間要小心燶底及乾水。

4. 牛肉餡煮好就煎手抓餅，煎pan落少少油，將手抓餅煎至兩面金黃。然後用鑊鏟及筷子將手抓餅整到鬆散，再將牛肉餡放入焗盆，並放上手抓餅就完成。如果預早整定，食之前可以再放入焗爐翻熱。