聞西──炒洋蔥出靚湯 一理通法國明

十二月初最高溫度竟然有三十度，本來都幾擔心今年要著短袖衫過聖誕，好彩氣溫驟降正好配合聖誕節嘅來臨。我細個讀天主教小學，屋企人都係天主教徒，所以每年平安夜都會去教堂望子夜彌撒，接近午夜加上強勁嘅西北風，凍到唱聖詩都有天然震音，個腦淨係諗住杯熱辣辣嘅阿華田，哈哈！

除咗熱飲之外，一碗熱騰騰嘅湯絕對係暖身嘅妙品，今期分享嘅法式洋蔥湯食譜，最啱寒冷嘅冬天。我知好多朋友都覺得洋蔥湯好複雜好難煮，無可否認呢個係一個心機菜，除咗切洋蔥，炒洋蔥都至少要半個鐘頭，真係少啲心機同耐性都唔得。其次就係個上湯，我用咗姬松茸及牛肝菌做湯底，比罐頭牛肉湯有過之而無不及，更加健康有益。

洋蔥湯要好飲，炒洋蔥非常重要，緊記要慢火慢慢炒至洋蔥焦糖化（呈深啡色），千祈唔可以炒燶，有少少黏底嘅狀態係正常，記得要將黏底嘅焦刮出嚟，咁會令到湯頭味道更加濃郁。另外洋蔥切絲都有要求，要順住紋理打直切，洋蔥絲就無咁容易煮到散晒。雖然坊間有好多切洋蔥唔會喊嘅方法，其實最簡單帶番個泳鏡就得啦。

材料：（二人份量）

洋蔥......2個約400g

姬松茸.................20g

牛肝菌.................12g

法包...................2片

馬蘇里拉芝士......80g

百里香.................適量

黃糖.................1茶匙

水...................1000ml

鹽及胡椒粉.........適量

做法：

1. 首先預備湯底，姬松茸、牛肝菌浸軟，留低浸菇嘅水份，姬松茸多沙要反覆洗乾淨。易潔鍋落橄欖油，放入揸乾水嘅姬松茸、牛肝菌炒香，然後落1000ml水（包括浸菇水），煲滾後慢火煮半個鐘。熄火後，再浸半個鐘備用。

2. 將洋蔥切成幼絲，易潔鍋加適量橄欖油，然後落洋蔥絲慢火炒至半熟，之後加入黃糖繼續炒至焦糖化。切記唔可以心急，全程慢慢火炒，大約20至30分鐘，洋蔥絲就會變成吸引嘅焦糖色。

3. 之後倒入湯底，滾起後慢火煮半個鐘（小心控制水份）。然後，按個人口味落鹽及胡椒粉調味，鍾意重口味嘅不妨調味落重啲。

4. 將湯料倒入可以放入焗爐嘅湯碗，每碗放上一片法包增加香味，再撒下芝士碎。然後放入已預熱至200度焗爐焗5至8分鐘，或焗至芝士變成金黃色就可出爐。最後，可以用煲過湯嘅菇及一小枝百里香做裝飾。