聞西──葡萄牙海鮮年糕湯 高質享受在於「糕汁」

年廿八想必大家都忙緊洗邋遢，可能正值實施垃圾徵費前夕，身邊多咗朋友為屋企做深層大掃除。最近睇咗個日本電視節目講斷捨離，個雜物管理諮詢師話，好多人鍾意儲埋啲嘢，都只係懷念過去嘅日子，但就忽略咗記憶空間係無限嘅。佢提議藉斷捨離重溫舊日時光，然後好好清理舊物放低過去，同時騰出更多起居空間，生活就有更多可能性。

除咗清潔家居，清「糕」都係一大挑戰。其實年糕都可以斷捨離㗎，感謝親友每年都送我好多年糕，但為免浪費食物、浪費朋友嘅心意，除咗留少量自肥外，其餘都會送畀有需要嘅朋友仔，又或者捐去慈善機構再轉贈有需要人士。

今期分享嘅食譜都同年糕有關，但唔係中式年糕，而係韓國年糕。原來韓國同樣會過農曆新年，年糕湯係韓國春節必備嘅食物，白雪雪嘅韓國年糕有乾淨、純潔嘅象徵，長條型嘅年糕象徵「長壽」，切片年糕外形似錢幣，有財源滾滾之意。今次我用咗煮葡萄牙海鮮飯嘅方法配搭韓國年糕，估唔到又幾夾，雖然用嘅係好經濟嘅急凍紅蝦，依然煮出濃郁嘅蝦湯。年糕會釋放出澱粉質令湯汁變得濃稠，更加容易掛汁，每一啖都充滿海洋味。可以嘅話，用新鮮海鮮就更加好味啦！

材料：

韓國年糕條.............500g

上湯......................1公升

急凍紅蝦.................500g

青口及蜆各.............300g

罐頭即食鮑魚仔........4隻

蒜頭..........................5粒

洋蔥.........................半個

白酒........................50ml

罐頭蕃茄.................150g

Paprika紅椒粉.....1茶匙

黑胡椒碎..................少少

蕃茜碎......................適量

檸檬.........................1個

鰹魚湯包...................2個

做法：

1. 首先準備上湯，用2包鰹魚湯包加一公升水，煲滾後煮5分鐘熄火。紅蝦分開蝦頭及蝦身，蝦身去殼（保留蝦殼）開邊挑出蝦腸，用廚紙印乾水份，蝦頭除去沙囊。

2. 燒熱平底鑊落油，煎熟蝦肉夾起，再落蝦頭蝦殼炒香，用鑊鏟按壓蝦頭擠出蝦膏。之後，灒入白酒，待半分鐘等酒精揮發，加入上湯冚蓋煮滾，同時準備蒜蓉及洋蔥碎。

3. 用隔水箕隔走蝦頭蝦殼，加入蜆、青口煮至剛熟立即夾起。準備另一個平底鍋，燒熱落油爆香蒜蓉、洋蔥碎，加入茄膏炒香，再加入蝦湯、罐頭蕃茄及Paprika紅椒粉，冚蓋煮15分鐘。

4. 開蓋放入韓國年糕煮至軟身，期間要定時攪拌避免黐底。熄火後落蝦肉、蜆、青口、鮑魚擺盤，最後灑上檸檬汁、黑胡椒碎及蕃茜碎就完成。