聞西──寒夜裡的小確幸 暖笠笠蝦湯燜飯

人生總會遇到幾個喜歡閙人的長輩，這些「老海鮮」恃着活多你幾十年，人生閱歷豐富，話人「唔使本」，多活幾年已經是皇牌，左一句「食鹽多過你食米」，右一句「你都唔嗅米氣」。不過，後生仔可能不會明白甚麼叫「唔嗅米氣」，那就等我解釋一下吧。所謂「唔嗅米氣」，即是話你「識得嘢少」，仍未戒奶，就連米的氣味也未聞過。但計我話，長命不等如見識多，一個人的智慧和修養絕對不可以用時間來衡量，我依然相信未來是年輕人的，我們理應要好好珍惜和愛護他們！

現實上這句「唔嗅米氣」可能更適合形容所有香港人，或者物質豐富，我們有太多選擇，香港人食米量愈來愈少，根據紀錄，從1960年每人每月吃9.2公斤，到2018年只有3.4公斤，下跌的速度都幾驚人！

我家五兄弟姊妹，小時候每次開飯都好像一場競爭，小朋友當然愛吃餸菜，唯獨我喜歡吃飯，最喜歡以餸汁或湯撈飯，沒餸也可以，雞蛋豉油熟油撈飯又一餐，直到現在仍然喜歡這種飽肚的感覺。想年青人多吃飯，可以試試我這道燜飯，味道濃郁，材料豐富，熱辣辣，暖笠笠，是一份寒夜裏的小確幸！

調味料：
茄膏2湯匙、黃薑粉1/4茶匙、泰國咖喱粉1/2茶匙或普通咖喱粉1/4代替。

材料：
1.白飯1碗
2.番茄100克
3.急凍青豆50克
4.洋蔥100克
5.小鮮菇50克
6.海中蝦半斤
7.牛油20克
8.水約500毫升。

做法：

1、中蝦切去蝦頭，除去腸及殼，蝦肉切粒，蝦頭剪去觸鬚，用菜刀輕壓方便出味。

2、小鍋燒熱落油，爆香蒜蓉、洋蔥碎及蝦頭，落牛油炒至洋蔥半熟，然後加入調味料炒勻，再加入水份，煮滾後以慢火煮15分鐘。

3、夾起蝦頭，然後加入番茄、青豆及鮮菇煮3分鐘。

4、加入白飯及蝦肉，燜煮多5分鐘，最後以鹽調味，亦可加點香菜或香草調味。