聞西──搵啱豬隊友 虎門蟹餅 鮮味到頂

以前提及「青蟹」好容易令人聯想起舊時綠色嘅十蚊紙，不過自從2007年起「青蟹」已經被新發行嘅十蚊塑膠銀紙（俗稱膠蟹）取代，而家啲後生仔女應該冇乜機會見過「青蟹」十蚊紙喇。當然，佢哋更加唔會知道肉蟹同膏蟹其實都係青蟹，我講緊嘅青蟹當然係食得嗰種啦！

今次分享嘅食譜都關青蟹事，佢係虎門鎮一道家傳戶曉嘅家常菜「虎門蟹餅」。虎門位處鹹淡水交匯處，水產資源豐富，尤其盛產青蟹，肉蟹肉質零舍鮮美，而膏蟹蟹膏更加豐富。虎門蟹餅就係當地人以陸上嘅豬肉同雞蛋搭配來自海上嘅蟹，加埋金不換提香，成就一場海陸鮮味大匯演。

虎門蟹餅主要材料有蟹、豬肉、雞蛋及金不換，材料雖然簡單，但離唔開個「鮮」字。蟹當然要新鮮，最好生劏，如果驚（包括我）就煮之前大半個鐘將蟹放入冰箱，等佢唔再郁先處理。當地食譜多用膏蟹，會將蟹膏取出同蛋漿混合，我反而鍾意啖啖肉嘅肉蟹多啲。其實咩蟹都冇所謂，除咗水蟹例外囉！至於豬肉新鮮之餘，仲要用手剁嘅，咁至食到肉嘅質感同鮮味，最好用三分肥、七分瘦嘅梅頭豬肉，十分鐘就剁好。蛋漿混合蟹件、豬肉同其他調味料，以鮮蒸後焗方式逼出蟹餅油脂同香味，呢個餸試過一次真係返唔到轉頭！

材料：

肉蟹或膏蟹1隻約12両、雞蛋4隻、梅頭豬肉半斤、金不換1棵、蔥適量、薑3片

調味：

生抽、蠔油、紹酒各1/2茶匙、胡椒粉1/4茶匙、鹽少少

做法：

1. 梅頭肉洗乾淨抹乾剁碎，金不換及蔥切碎，薑片切成幼薑絲或剁碎。

2. 將蟹放入冰箱雪大半個鐘，取出之後喺蟹腹部中間切一刀，除去蟹掩、取下蟹鉗、蟹蓋、除去蟹胃、蟹腮。洗刷乾淨蟹身之後，再砍成共4件，剪走蟹腳尖，批走蟹蓋殼邊，略略敲碎蟹鉗。

3. 將雞蛋、豬肉、金不換及蔥粒置於焗盤中，然後落調味料，再用筷子拌勻。

4. 將處理好嘅蟹件放上蛋漿，先用大火蒸十分鐘，然後放入230度預熱焗爐焗十分鐘，或焗到表面金黃就搞掂。想靚啲可以贊少少熱油。

【小提示】

其實用嚟綁住蟹嘅繩，索晒水都好重。以我今次為例條繩超過三両，所以買蟹嘅時候，就要心裡有數喇。