聞西──剝皮辣椒兩食 肉餅雞湯高顏值

喺仲未有雪櫃嘅年代，以前嘅人為咗延長食物嘅保存期，有人會將瓜果風乾曬乾，亦有人為食物加工研發出各種嘅醃漬物。我向來都好欣賞醃漬物，即使有人話佢哋唔健康，我都會不離不棄，因醃漬物代表咗前人嘅智慧、地方嘅風味、味道嘅傳承，絕對值得尊重同珍惜。

當然每個地方都有醃漬物，大家去旅行時候不妨留意一下，今次介紹一款來自台灣嘅醃漬物「剝皮辣椒」。因為之前已經聽過「剝皮辣椒雞湯」呢個台灣家常湯，今年去宜蘭專登買咗一樽試吓。點解叫剝皮辣椒？因為製作時會將青辣椒先油炸後剝皮，再用醬油、糖、鹽等醃漬，不過現代版嘅剝皮辣椒大多都唔會油炸及剝皮。剝皮辣椒同好多醃漬物一樣味道比較重，由於已經去籽所以只有微辣，醃汁帶有甜味及醬香味。今次真係一椒兩味，分別用剝皮辣椒做蒸肉餅及雞湯。

整肉餅瘦肉同肥肉嘅比例，究竟係幾多呢？半肥、7/3、8/2？我自己就鍾意8/2。有好多人怕街市或者預製嘅免治豬肉唔衞生，其實一般嘅食物處理器都可以將肉攪碎，自己喺屋企「攪」掂，咁就又衞生又唔使剁到手軟啦！

【剝皮辣椒蒸肉餅】

材料：

梅頭肉或

免治豬肉.............1斤

剝皮辣椒...........120g

剝皮辣椒醃汁....60ml

鹹蛋....................1隻

蒜蓉................1湯匙

調味料：

豉油................1湯匙

米酒................1湯匙

糖................1/2茶匙

麻油............1/2茶匙

胡椒粉.........1/4茶匙

做法：

1. 將梅頭肉用食物處理器攪碎，再用手撻至起膠。

2. 剝皮辣椒切碎，連同調味料加入免治豬肉拌勻。

3. 置於深碟中，中間放上鹹蛋，以大火蒸20分鐘，最後淋上適量豉油及麻油。

【剝皮辣椒雞湯】

材料：

雞扒......................1件

剝皮辣椒...............3條

薑..........................3片

乾香菇..................數隻

剝皮辣椒醃汁....2湯匙

米酒..................2湯匙

水......................1公升（包括浸香菇水）

做法：

1. 易潔小鍋唔使落油，雞扒雞皮向下放入鍋慢火煎出雞油，同時落薑片煎香。

2. 雞扒拎起切件，將已浸軟嘅香菇爆香，然後將雞扒件回鍋炒香。

3. 加入水分煮至滾起，再慢火煮10分鐘，落埋已切段嘅剝皮辣椒、剝皮辣椒醃汁及米酒。最後以鹽調味。