聞西──四川孔乾飯 粒粒油香撲鼻來

小弟趁住復活節假期去咗成都幾日，喺成都除咗必去嘅成都大熊貓繁育研究基地、樂山大佛、三星堆博物館等等名勝景點外，另一個重點就係當地嘅美食，尤其係同我一樣鍾意食辣嘅朋友，喺嗰度簡直係去咗天堂一樣，周街都見到缽缽雞同火鍋店，四處都聞到陣陣嘅香辣味！

缽缽雞係四川一種傳統冷盤小食，用竹籤將食材串起，然後放入裝住雞湯及紅油辣椒嘅缽仔浸住，通常都係一蚊一串咁賣，食材就冇乜限制，我食過雞肉、海帶、蓮藕片、萵筍等，都幾過癮嘅。另一種經常見到嘅舖頭就係火鍋店，同重慶一樣，成都都好興食牛油火鍋，呢類火鍋係用牛油加埋豆瓣、辣椒、花椒等材料，炮製成一片橙色辣油嘅湯底。另外，亦有專營火鍋底料嘅手信店，啲貨除咗作為手信亦可自用。

今次介紹嘅孔乾飯係一款好貼地嘅四川美食，唔辣㗎！有啲類似廣東人嘅煲仔飯，但唔係用生米煮成熟飯，而係通常用鑊仔上枱，店員即場加水冚蓋將飯加熱，等飯收乾水再同一早放喺飯面下嘅材料拌勻，煮多一陣等佢起飯焦就食得。過程充滿儀式感，飯粒油潤香氣撲鼻！孔乾飯用料都幾平凡，常見嘅配搭有四季豆、四川臘肉、薯仔等，好有農村風味！四川臘肉係用柏樹枝、木屑、陳皮等燻料煙燻而成，有股獨特嘅煙燻香味。而家嘅臘肉全部都係真空包裝乾淨衛生，大家有興趣可以試吓喺網上平台購買。

材料：

四川臘肉100g、急凍青豆100g、香菇數隻、薯仔200g、薑10g、白飯兩大碗

調味：

生抽2湯匙、鹽適量

做法：

1. 先將所有材料包括薯仔、浸軟咗嘅香菇、四川臘肉、蔥及薑切粒。

2. 煲仔落油慢火先爆香薑粒及臘肉粒，然後順序加入香菇、薯仔及青豆粒炒香。

3. 將白飯平均鋪喺材料上面，落50ml水分，並加蓋煮到無水而蒸氣排出。

4. 將飯同其他材料拌勻，加生抽同鹽調味，繼續慢火煮至聞到飯焦香味。最後，隨心加入蔥粒或芫荽碎。