聞西──Mad Gor Garlic！ 蒜香籠仔蒸糯米飯

一向行山都係為咗影相嘅我，上星期復活節四日假期瞓咗兩日半，心諗唔可以再頹落去，又心癢癢想整蛋糕。

不過近排煮得多又食得多，已經輕鬆變成「米芝蓮」車胎腰，於是改變計劃約幾個朋友行半日山，今次目的地係大嶼山嘅花瓶頂，因為交通超級唔方便，唔使諗住揸車因為無位泊，搭巴士要去到青馬大橋收費廣場落車先去到起點，所以人跡稀少都幾安全，沿途有橋景有海景有山景又有奇石景。

唔使問梗係影咗好多靚相，無諗過放上臉書後會比朋友話我好出去行山，對唔住班出生入死嘅醫護人員，我無怪呢位朋友，相信佢都係善意嘅批評，可惜我忍不住第一時間回應佢：我日日返工迫巴士地鐵又唔見你出聲？之後大家都無再討論落去，其實疫情已經持續咗幾個月，我諗一啲正常嘅唞氣活動都係需要嘅，例如喺屋企附近散下步咁，只要唔好去人多聚集嘅地方，又做足防疫措施就可以啦！

計下數已經好耐冇去過酒樓食飯，好想食蒜香膏蟹籠仔荷葉蒸糯米飯，自己做當然得啦，其實最緊要係個蒜蓉醬，基本上配任何海鮮都可以，我懶無去街市買餸，惟有出動急凍蝦仁，始終都係差點鮮味，可以加入乾菌提香，加上荷葉嘅清香，足夠令人食指大動。

材料:
糯米2杯、乾荷葉1塊、牛肝菌乾15g、櫻花蝦乾10g、急凍蝦肉200g或其他海鮮、莞茜蔥碎適量

蒜蓉醬材料:
蒜頭1個、油100ml、生抽2茶匙、魚露2茶匙、糖1茶匙、粟粉1/2茶匙

做法:
1. 糯米洗乾淨用水浸4個鐘，蒸籠鋪上乾淨布（或剪開魚湯袋代替），隔水蒸半個鐘再熄火焗10分鐘至全熟

2. 蝦肉開邊，落少少胡椒粉、鹽及紹酒醃一陣，牛肝菌浸軟切粒

3. 蒜頭切碎以慢火炸至金黃色，倒去一半油份，再加入生抽、魚露、糖及粟粉拌勻

4. 荷葉用熱水浸軟後鋪在蒸籠內再掃油，然後倒入糯米飯，蝦肉、牛肝菌、櫻花蝦與蒜蓉醬撈勻，放在糯米飯之上，隔水蒸10分鐘取出，打開荷葉灑上大量莞茜蔥碎，最後淋上煲仔飯醬油即可

小貼士：

紫皮蒜味道比其他蒜頭更香，另外炸過蒜蓉嘅油其實都充滿蒜香味，用嚟炒菜或者撈麵都好得！