聞西──當魚腐遇上蛋白就係咁鬼滑

借錢絕對唔係一件醜事，最緊要有借有還，香港地邊個唔係欠銀行一千幾百萬呢？成世人做樓奴，唔飲唔食都要繼續供樓，幾唔掂都要靠自己撐住，有邊個可以幫你呢？我哋嘅海洋公園就唔同喇，借錢易過借火，今個月伸手下個月就要到手，不特止呀，當中大部分原來係攞嚟還舊債，淨番嗰啲又唔捱得幾耐，即時諗起政府嗰句宣傳口號：借定唔借，還得到先好借！

由集體回憶攪到變咗集體負債其實都幾令人心噏，錢政府唔係無，不過要用得其所，要記住啲錢係廣大嘅納稅人辛辛苦苦賺番嚟，唔係官員亦唔係立法會議員更加唔係俾一班官商當私人俱樂部咁去亂花，相信大家都係講道理，都唔想睇住呢隻陪住我哋幾代人嘅「海馬」就咁玩完，更加唔想員工失業，所以可唔可以從根本去改善管理重振聲威呢？

介紹番今期呢個「四百次泰式魚腐炆鮮菇」食譜，唔知近排潮流興嘅400次咖啡會唔會好快成為集體回憶？不過可以肯定原來大家都有隻摩打手，咁就啱晒喇，想魚腐滑啲，就要加入打到企身嘅蛋白落魚漿，然後炸成金黃，熱辣辣就咁食已經好好味，今次用咗紅咖喱做魚腐，多咗份鹹鮮辛香嘅味道，加埋鮮菇一齊炆，睇同食都一樣咁滑滑。

材料 :

魚腐調味料 :
紅咖喱醬1湯匙、粟粉1湯匙、糖1/2茶匙、胡椒粉1/4茶匙

調味料 :
蠔油1湯匙、生抽1茶匙、紹酒1/2湯匙、麻油1/2湯匙

做法 :
1.鯪魚肉落調味料打至起膠，加入蛋黃攪勻

2.蛋白打至企身，然後分3至4次加入魚漿攪勻

3.慢火燒熱鑊油，用匙羹做成球型放落熱油炸至金黃備用

4.砂鍋落油爆香薑片，隨即落魚腐、鮮菇、蠔油及生抽炒香，倒入100ml水冚蓋炆煮5分鐘至收汁，落蔥段、麻油贊酒，最後埋茨即可