聞西──肉骨茶 X 獅子球 索汁索味好和味

是咁的，經常都有朋友問：「乜你屋企有好多人㗎？」我笑住反問：「點解咁講呢？」朋友：「因為見你煮啲嘢都好大份囉！」

我屋企真係有好多人，不過已經係二、三十年前嘅事，有一段時間我負責一家九口嘅伙食，即使之後獨居，我煮嘢仍然都係大大份，正所謂易放難收嘛，其實煮嘢份量真係唔可以太少，我就最怕啲食譜樣樣材料都係少少，叫人哋點樣買餸好呢？

煮大份啲材料容易掌控，又冇咁容易浪費食物，好多時食材買到返嚟，你諗住用一半，一半放返入雪櫃，點知放下放下就會唔記得咗佢嘅存在，我試過好多次啲食材擺到發霉發臭先發現，真係好後悔點解唔即刻食埋佢！一碟餸分兩日食都好過分兩日煮嘛，而且煮多啲又可以帶飯，第二日放工又可以偷懶唔煮飯，所以我成日都食隔夜餸㗎，哈哈！

唔想一餐飯一個餸太悶，我會煮個綜合型菜式，即係裏頭有肉有菜有汁，就好似盤菜咁，食唔晒第二日又可以加啲材料落去，真係好方便。今日介紹大家做「肉骨獅子球」，顧名思義用咗肉骨茶湯底配自家製獅子球，就算用豬絞肉都好好食，記得叫肉檔比豬後腿肉，好有肉味又有咬口！肉唔使太肥因為我會加玉子豆腐，所以絕對唔係嚡口，如果唔想炸嘢可以將肉丸放湯定型，紹菜吸哂啲汁先係「賣飛佛」！

材料：
乾冬菇8隻浸軟、薑幾片、蒜頭一整個、豆腐卜適量、肉骨茶包1個、紹菜300g、豬絞肉350g、玉子豆腐1條

醃料：
胡椒粉1/4茶匙、鹽1/4茶匙、玫瑰露1茶匙、生抽1茶匙、麻油1茶匙、蠔油1茶匙、粟粉2茶匙、雞飯老抽2茶匙（普通老抽亦可）

做法：
1. 豬絞肉落醃料拌勻，玉子豆腐剪個小缺囗，慢慢加力揸壓出嚟加入肉中，拌勻後不停攪至起膠，然後平勻分成八個肉丸。

2. 用長匙羹將肉丸放入滾油炸至金黃，撈起備用。

3. 原個蒜頭洗淨切去頂部，鍋子落油先煎香蒜頭，夾起再爆香薑片，然後熄火。

4. 鍋裏先放紹菜，上面再放冬菇、肉丸、蒜頭及肉骨茶包，倒入700-800ml水份，冚蓋慢煮30-45分鐘，食之前可以落生抽調味，最後加入豆腐卜就大功告成。