聞西──汁都撈埋！超入味印尼咖喱雞試配綠色米粉

根據港府統計處統計，截至2019年3月底，香港總共有外傭人數差唔多40萬人，大約每7個家庭就有1個家庭有請外傭，就好似外傭公司廣告咁講：「Tak成女傭，融入家中」，既然融咗入你家中，咁即係自己人啦，不過唔係個個都係咁諗㗎，前排睇到個裝修公司廣告，標榜用盡室內每一寸地方，個大櫃下面有個好似太空艙嘅地方，原來就係工人姐姐瞓覺嘅地方，個所謂設計師仲好自滿咁話用咗百葉窗設計做「房」門等姐姐間「房」空氣流通咁話喎！

雖然叫工人啫，但人哋都係打份工，你唔係做咗皇帝皇后喎，將心比己自己願唔願意瞓喺個箱入面先，人哋離鄉別井嚟到真係冇得揀，有啲僱主仲成日呼呼喝喝，真係聽到就嬲呀！喺香港僱主就係佢哋最親嗰個，真係好需要有同理心同愛心㗎！我信㗎，你點對人、人就點對你。

如果我有個印尼姐姐，我一定要佢日日煮印尼餸比我食，印尼餸當中我最鍾意嘅就係咖喱雞，同煮泰國咖喱一樣，最緊要係個咖喱醬，去到印尼雜貨店就買到，認住Gulai咖喱Ayam就一定冇買錯，如果你用全雞，最好叫老闆斬大件啲，太碎好多碎骨唔方便撈飯（親身體驗），個人認為用雞翼已經可以，今次買咗包綠色嘅米粉配咖喱汁又幾得意喎，真係冇乜難度，我哋一齊試吓煮啦！

做法:

1.先準備好香料，蒜頭略拍、乾蔥頭切片、香茅切段略拍、南薑洗淨切片、檸檬葉除去葉梗、班蘭葉切段、紅辣椒可完隻落或切粒，薯仔要切大件，否則容易煮爛，今次雞就唔使醃喇。

2.落多少少油，開個細火落埋印尼咖喱醬，慢慢推開炒香，之後加埋香料炒香（班蘭葉、檸檬葉除外）。

3.落雞件或雞翼略炒，之後落埋班蘭葉及檸檬葉炒勻，然後加入椰青水冚蓋。

4.滾起之後再落埋椰漿及薯仔，冚蓋慢火煮20-25分鐘，如果想個汁杰身啲就炆到收多啲汁，不過小心會過鹹！如不夠味就加少少鹽調味啦，最好煮完唔好即刻食，放多幾個鐘就更入味！