聞西──宴客必學！鎮江黑蒜一字排

朋友笑我：駛唔駛炒個飯都要影相放上Facebook，話俾人聽自己食咗啲乜嘢呀？
我話：你理得我咁多啫！哈哈……

喺整嘢食方面，我係有啲姿整嘅。就算一個人食，用合適嘅碗碟、靚靚嘅擺盤、再影張靚相，已經係我最好嘅娛樂，可以唔記得晒日頭返工嘅辛苦激氣。原來有研究顯示，親自下廚真係可以幫助改變精神狀態㗎。

根據美國密西根州烹飪藝術治療師Julie Ohana研究，返屋企煮飯係一種非常有效嘅放鬆減壓方式。首先習慣煮飯嘅人，當開始煮飯大腦係會自動將「工作模式」轉為「家庭模式」，令身體及精神即時脫離工作狀態，個腦就唔會繼續諗公事。其次，如果覺得自己嘅工作重複單調又缺乏挑戰，可嘗試煮啲未煮過嘅菜式，或者自創一啲新菜式，刺激一下「生咗鏽嘅大腦」，去加強創意及解決問題嘅能力。

有時我唔開心，都會整麵包舒緩一下情緒，從搓麵粉、發酵、準備餡料，以至入爐等待成品，令我將專注力由工作或者挫折中，轉移到正面嘅活動或者目標之上，防止負面情緒繼續發酵而鑽咗入牛角尖。不過一講到煮完要洗碗，我朋友就話：咁我都係出街食好過！真係俾佢激死（吐血）!

上星期，約咗一班同事嚟我屋企食飯，宴客梗係有好多嘢要準備。想多啲時間同客人傾計摸下酒杯底，最好就係整炆煮嘅餸，可以一早預備定，到上枱前翻熱就得。今次分享呢道「鎮江黑蒜一字排」，啱晒嚟宴客，酸甜菜式永遠係好受歡迎，當中加入黑蒜最令大家驚喜，黑色蒜肉煙韌軟糯，辛辣味早已經bye bye咗，淨番嘅香甜味道。記得唔好去皮煮，否則粒蒜肉會消失得無影無蹤，等到食嘅時候先好去皮呀。

材料 :
一字排1斤、冰糖100g、黑蒜8粒（加多啲都冇問題啦）、蒜頭5粒（去皮略拍）、薑2片、鎮江醋130ml（我用開淘大牌，半支剛剛好）

醃料 :
生抽2湯匙、紹酒1湯匙、雞飯老抽1湯匙、油1湯匙、粟粉1茶匙、胡椒粉1/4茶匙、鹽1/4茶匙

小貼士 :
呢個餸係要「抖」下先好食，即係煮完唔好即刻食，最好放半日或者幾個鐘就會更加好味，啲肉入口鬆化，用汁撈飯又唔怕肥，感覺一流。

做法:
1. 一字排拌入蒜頭落醃料，拌勻醃半個鐘。

2. 鐵鍋落油爆香薑片，然後落一字排慢慢煎香兩邊。

3. 加入冰糖、黑蒜及鎮江醋煮半分鐘。

4. 加水至材料表面，冚蓋滾起後，慢火炆大約個半鐘。最後開蓋轉細火，煮到啲汁起泡變稠就得。如果冇鐵鍋就要留意水份，否則好易燶㗎！