聞西──加埋百合潤肺唔夭肺 黑椒勝瓜炒牛肉

兩公婆或情侶少不免會嗌交，吵吵鬧鬧有時都會增進感情（如果可以和好如初嘅話）。不過，吵大鑊嘅時候，通常好容易「出口成文」，最唔應該講嘅都講埋，例如：「你對朋友仲好過對我……」簡直一刀插入你心，平時對佢點好都唔記得晒。

投訴愛侶人前人後兩個樣，真係好普遍。近排就有港媽喺網上發文，大呻老公WFH冇幫手湊細路，一放假就瞓，叫佢做家事又聽極唔明似有SEN（特殊教育需要）。帖文一出引起大班港媽共鳴，紛紛痛斥自己老公工作萬能、家事無能，係好難溝通嘅人形物體！不過呢個人形物體有時會係你司機，有時會幫你分憂解煩，又有時會係一張「冇限額」嘅信用卡（當然現實中唔會係），所以世事真係冇完美㗎，就忍下啦！哈！

講到尾，家庭和睦最緊要。好似煮嘢咁，材料及調味最緊要夾，今次分享嘅食譜「黑椒勝瓜百合炒牛肉」，一清一濃互補不足，當中嘅鮮百合就最啱「燥底伴侶」，因為百合具有養心安神、潤肺止咳嘅功效，特別適合養肺，話唔定可以減少好多「肺話」呢！話時話，細個食什扒飯最鍾意配黑椒汁，依家就等我哋一齊回味一下吧。

材料：
牛肉180g，勝瓜一條360g，乾雲耳10g，鮮百合60g，大紅椒1隻，蒜頭2粒，姜3片

醃料：
麻油，糖，栗粉各1茶匙，水1湯匙

黑椒汁：
海鮮醬2湯匙，生抽1湯匙，老抽1湯匙，黑椒碎1茶匙，水80ml

做法：
1. 牛肉逆紋切片，先落麻油、糖撈過，再加一湯匙水拌勻，最後先至落粟粉撈勻。

2. 勝瓜刨去凸起嘅皮，唔好刨得太深，否則煮嘅時候好容易爛晒。跟住滾刀切件，乾雲耳浸軟，百合洗淨，大紅椒切片，薑切片、蒜頭略拍，拌勻黑椒汁備用。

3. 中火海鑊落油，爆香薑切片、蒜頭，隨即落牛肉及紅椒片，快炒至半熟盛起。

4. 原鑊再落油，落勝瓜件及雲耳略炒，加50ml水冚蓋焗1分鐘，立即將牛肉回鑊炒勻，落黑椒汁及百合再炒1分鐘。落少少鹽調味，最後打個薄茨就搞掂。