聞西──阿嫲教落 古早味生菜鯪魚肉

自從日日罩不離身，好耐冇喺街邊篤魚蛋食燒賣飲珠奶，雖然可以買返屋企食，不過就係冇咗嗰種「掃街」嘅感覺。最近喺Facebook發現一個「香港燒賣關注組」嘅page，有三萬幾follower，佢哋好專業咁為各區賣燒賣嘅小食店評分，仲要細分味道、口感、醬汁、賣相及價錢去逐一品評，有時候仲會分享一啲用燒賣做嘅特別菜式，有啲都幾「驚嚇」又有趣㗎！

講番我仲係細路仔嘅時候，我都係幫襯街邊木頭車流動小販食燒賣，熱辣辣又彈牙，連豉油辣油都好食過依家多多聲。如果掃街當lunch，通常都會食埋碗生菜鯪魚肉墊胃。話時話，呢個反而冇乜點變，就係咁多年啲魚肉都係咁假，哈哈！都係成本問題啦，麵粉多過魚肉，不過街頭小食就冇可能太講究喇。

以前嫲嫲都有整生菜魚肉，不過會加米粉當正餐，街市賣嘅鯪魚肉通常都有經過調味，有啲係自己整，有啲就係攞返嚟賣。最好幫襯啲有用冰雪住嘅舖頭，如果聞到陣陣臭味，就千祈唔好幫襯喇！好多人都知道魚肉要撻到起膠先彈牙，如果用嚟放湯煮，阿嫲教一定要落少少水，咁樣魚肉先會滑。佢仲會加髮菜同埋蝦米粒，呢個就係我阿嫲嘅古早做法。至於湯底其實好簡單，蠔油加大地魚粉就攪掂，當然要落鹽，加少少韮黃就係雲吞麵湯底喇。我就姿整啲，食之前會落少少泰國炸乾蔥蝦米（街市泰國雜貨鋪有得賣），香味即刻提升100倍，平時食即食麵我都落㗎！

材料：
魚肉400g
生菜2棵
髮菜5g
蝦米20g
泰國炸乾蔥蝦米少少

調味料：
水2湯匙
粟粉1茶匙
麻油1茶匙
胡椒粉1/4茶匙

湯底：
水1公升
蠔油2湯匙
大地魚粉1湯匙
鹽適量
薑數片
韮黃20g

做法：
1. 浸軟髮菜及蝦米，髮菜略略切碎、蝦米切粒備用，留意蝦米唔使用太大隻嘅，韮黃同樣切碎，生菜洗淨切件。

2. 鯪魚肉落調味料用手撈勻，之後撻至起膠，然後加入髮菜及蝦米再拌勻，呢個步驟一定要用手㗎，先可以感受到魚肉嘅質地滑唔滑。

3. 水煲滾之後落湯底材料，滾起後用湯匙將魚肉逐少咁刮出嚟放入湯(外型長長哋咁)，煮至魚肉浮起即熄火。

4. 落少少鹽調味，隨即加入生菜件，利用餘溫浸熟啲菜，菜先可以保持脆身，最後食之前落少少泰國炸乾蔥蝦米提香。