聞西──筍乾炆豬肉 送飯真筍盤

喺大家勁嗌冇得去旅行嘅同時，亦有好多人因為咁冇咗個飯碗，我講緊嘅係國泰航空宣布大規模重組。國泰打破香港有史以來最大規模嘅裁員計劃，一次過削減約8,500個職位，最令人可惜嘅係有35年歷史嘅港龍航空都即時停止營運。

曾幾何時，空姐空少對好多人嚟講都係一份「筍工」，可惜我英文唔掂，否則可能都會衝上雲霄。大家都以為呢份工唔駛錢就可以環遊世界，又有超平機票想幾時飛都得，其實你睇佢好事實未必咁好。我身邊嘅空中飛人滿肚苦水，有人做到腰酸背痛，有人俾「西客」鬧到狗血淋頭，日夜顛倒嘅生活真係好難頂。做港龍嘅朋友仔仲慘，因為通常飛短程即日來回，或者喺當地停留幾個鐘就要再飛，長期身體疲勞，簡直係非人生活。正所謂：一方有難八方支援，大家不妨留意一下身邊有冇工作機會，可以主動介紹一下俾有需要嘅朋友仔。你一個幫忙可能已經救到人哋全家。換著係我被炒，都好想有人幫吓我，如果你仲有份工，咁就要好好珍惜喇，因為真係今日唔知聽日事！唉。

呢個世界又點會有咁多筍工呢，好「筍」就有。好筍同工作機會都係有期間限定，食筍最佳時間當然係農曆年前後，春筍細嫩多汁味道鮮甜，我就最喜歡台式食法加沙律醬。為咗保存呢份美味，農民將筍直接曬乾，脫水之後筍香更加濃烈，乾筍需要油份滋潤以回復生氣，用嚟炆豬肉就最好不過，炆完之後油潤爽口又脆身，真係可以扒幾碗白飯！

醃料:
生抽
老抽
麻油及紹酒各1湯匙
糖及粟粉各1茶匙
鹽1/4茶匙

做法:
1. 筍乾要預先浸軟，沖洗乾淨後切段，薑切厚片再切粗粒、蒜頭略拍、臘腸切片備用。

2. 五花腩切件落醃料，放入雪櫃醃半個鐘。

3. 落油先爆香薑粒及蒜頭，然後落五花腩，煎炒至金黃就落埋筍段、八角及辣椒乾炒番。

4. 加熱水至材料表面，冚蓋滾起轉細火炆一個鐘，見差唔多收晒汁就落埋臘腸片，煮多5分鐘就可以埋個薄芡，最後落少少麻油就攪掂。