聞西──NO羶羊腩煲 落埋甘蔗冇咁燥

真係天公做美，今年唔使著短袖T恤過聖誕，總算有番少少氣氛。天氣凍最好食咩呢？打邊爐？一年四季都可以啦，而我嘅選擇一定係羊腩煲。其實煮羊腩煲唔係想像中咁難，跟住食譜一步一步做，味道唔會差得去邊，最煩反而係前期嘅準備功夫，如果冇心機做就千祈唔好整喇，叫個外賣就算啦！

首先係揀羊肉，富貴朋友話新鮮黑草羊係不二之選，不過一斤佰幾二佰蚊，我就唔係好捨得喇。凍肉店有切好嘅急凍羊腩，但通常都會混集唔同嘅部位，好多奸商會將啲腳呀、骨呀撈埋落去，質素真係麻麻地！多年前，我喺元朗大橋街市一間凍肉店搵到原件黑草羊，而且係細羊，可以自己揀羊腿或者腩位。其實兩溝最好，羊腿多肉、羊腩連皮帶骨就特別滑，睇啱先叫佢切就最穩陣。最近喺Citysuper發現由新西蘭入口嘅羊腩，仲要唔係急凍嗰種，600g賣70蚊真係相當抵食，可惜已經去皮，未必人人鍾意。急凍羊要去羶味（騷味）好簡單，我甚至唔會將羊腩解凍，直接去出水就得，最緊要慢慢火去煮，等啲羊腩出晒啲血水，之後撈起洗乾淨再等啲血水流晒出嚟，咁就唔會羶㗎喇！

要「No羶」，我仲有一個秘訣，就係用大量薑、蒜頭同埋紅蔥頭起鑊，慢火煎到香透為止，之後先落羊腩炒香。醬料方便我主要用柱侯醬、腐乳等，有朋友問點解唔似其他食譜用南乳，因為我覺得南乳味太搶，蓋過咗羊嘅肉味，我嘅習慣係炒香羊腩再落醬料一齊再炒香，味道會更香濃。其他配料例如馬蹄、冬菇、冬筍、支竹，就必不可少啦。我仲有兩個提示「些牙」俾大家，第一要落甘蔗，可以冇咁燥熱，第二去街市買個鹵水包或者炆羊香料，通常有齊草果、香葉等等嘅香料，入落煲湯魚袋就乾手淨腳啦。