健步足球 如飛夢想 呢班阿姐踢世盃

誰說年過五十就應該收起夢想？一班熱血女士，每周走進綠茵場，揮灑汗水、重拾節奏，活出人生下半場。其中阿芝與Jenny這對姊妹拍檔，更將於今年10月代表香港中華基督教青年會（YMCA），出戰西班牙舉行的世界盃女子賽，為香港而戰，為自己「繼續上，全力上」。

10月出戰西班牙舉行的世界盃女子賽，為香港而戰！

//最緊要係控制個波，唔好快過自己，要控喺自己腳下，唔好亂踢出去。——阿芝//

阿芝從來沒想過，自己會在50多歲那年走進足球場，更會穿上印有「Hong Kong」字樣的戰衣。她笑說：「因為喺Facebook見到有免費課程，就膽粗粗報咗名！」以往覺得足球危險、接觸多，「但健步足球唔可以跑、唔可以碰撞，安全好多，冇踢過都可以參加，試吓無妨。」

阿芝清楚記得自己第一次落場的情景，時間是2023年4月。「我拎住個波一踢，點知個波快過我，我點行都追唔番——結果就犯規啦！」她笑說，這場「蝦碌」初體驗至今仍歷歷在目。經過多次練習，她如今已經駕輕就熟，更分享自己的貼士：「其實最緊要係控制個波，唔好快過自己，要控喺自己腳下，唔好亂踢出去。」

//踢出世界？我以前唔敢講，諗都冇諗過，但而家真係有機會去西班牙，太開心。——阿芝//

著上波衫，氣勢即刻唔同晒。正面肯定係，所以補個側面同背影。

比勝負更重要的事 點頭之交變好姊妹

短短兩年，阿芝由參與者成為健步足球的代表球員，由第三屆踢到第五屆聯賽，更曾奪得「神射手」殊榮。「比賽真係學到好多，唔係次次都贏，但會知道自己邊度要改善，仲會培養到隊友默契。」

對她而言，比勝負更重要的，是認識了一班志同道合的朋友。尤其是Jenny，兩人由點頭之交變成並肩姊妹。「去台灣比賽同房之後熟咗，又住得近，一齊練波、傾仔女、講生活……」

今年10月，這對姊妹將首次踏上世界舞台。阿芝笑言：「朋友問我幾時踢出香港，我答：去咗台灣（交流賽）！佢哋再問：幾時踢出世界？我以前唔敢講，諗都冇諗過，但而家真係有機會去西班牙，太開心。」

相信影完相去血拼的力量，就如入球一樣難以阻擋。

早前一班姊妹赴台灣參加交流賽，踢波、食好嘢、笑聲不絕，人生上半場之後照樣精彩無比！

//自己加操、約隊友練波，定個目標，唔想將來後悔。——Jenny//

Jenny回憶起首次穿上印有「Hong Kong」字樣的球衣，內心百感交集。「從來冇諗過有機會代表香港。一開始仲以為係講笑，點知成真，當然想好好發揮。」對她而言，比賽成績固然重要，但最珍貴的，是這段難得的經歷。「當然想贏啦，但更想感受世界級比賽氣氛，識吓朋友。」她亦表示，現正積極備戰，「自己加操、約隊友練波，定個目標，唔想將來後悔。」

連仔女都讚：「阿媽，你真係型！」

【聽佢講】

體能明顯改善 鼓勵同齡人玩

Jenny補充，自從參加健步足球後，體能明顯改善。「肌肉結實咗，連美容師都話我精神啲、後生咗！」她笑言，最明顯的轉變是平衡力進步：「搭車唔使慢慢扶住，腳有力，自然穩陣。」

身為過來人，阿芝鼓勵更多同齡女士踏出第一步。「我介紹咗一對夫婦一齊參加，佢哋玩得好開心，精神都好咗。其實只要肯試，就會發現——原來運動可以咁快樂！」

【話你知】

球員唔准跑並禁碰撞

健步足球（Walking Football）2011年源於英國，2015年由YMCA引入香港，專為50歲以上人士及長期病患者而設。最大特色是「唔准跑」，球員只能行走，踢球高度不得超過1.83米，亦禁止身體碰撞。賽制為五人制，守門員只可用下手滾球。規則以安全為本，鼓勵長者及初學者無懼年齡，輕鬆參與，享受運動樂趣。

練波隨心所欲，落場比賽就通常撳低個波踢。

場上英姿煥發，盡顯功架。控得好、交得妙，自然入得到。