做超級快樂聯繫人 體育係關鍵

終於到了11月，可以觀看首次在香港舉行的全運會。當大眾目光聚焦於場館與賽事，有一位體育人選擇在社區層面耕耘，將運動從「競技」變成「連繫」，以創新的方式讓更多人透過體育重新連結健康、社會與個人。過程中，流露堪稱帶有宗教式的虔誠，並感受充實快樂。她是「SOCIAL S體育係」創辦人——黃婷（Tina Wong）。

我希望有一日，運動係香港人生活中自然存在嘅一部分。

「我哋成日講，體育對我嚟講，就係我嘅religion（宗教）。」Tina笑說，「我希望有一日，運動對香港人嚟講，都唔再係『要抽時間去做』嘅活動，而係生活中自然存在嘅一部分。」

體育家庭成長 DNA入晒血

//嗰陣冇Sport Marketing呢啲科，我就自己拼出嚟。//

Tina從小在體育家庭成長，父母曾是廣東省羽毛球隊成員。她笑言自己「DNA入晒血」，父母卻一早提醒：「阿女，千祈唔好做運動員呀！」「細個我成日喺球場邊長大，睇住佢哋教波、練習。可能因為見得多，我都鍾意郁嚟郁去。不過我媽媽成日講：你唔一定要做最叻嗰個，唔做運動員都可以好。」這句話，Tina一直放在心裡。

Tina選擇修讀商科，再自行配搭體育科，走出一條沒人走過的「雙主修」路。「嗰陣時根本冇Sport Marketing呢啲科，我就自己拼出嚟。」大學畢業後，她進入馬會，負責賽馬及足球博彩推廣，開展了長達八年的體育行銷生涯。「嗰時啲前輩仲會問：『做體育有冇生意㗎？』」Tina笑說。「而家睇返，其實嗰段時間令我學識點樣將運動變成文化、變成故事。」

我成日覺得自己唔係做運動嘅人，我係用運動做人。

從商業推廣到社會創新

//一邊做生意、一邊創造社會效益。//

離開馬會後，Tina創辦公司，承接大型運動賽事推廣。直至2019年，她決定裸辭，與志同道合的拍檔共同成立SOCIAL S體育係，以社創模式營運。「我希望唔止做event，而係用體育達到多重目的。」Tina解釋。「以前賺完錢再去捐錢，而家我哋可以一邊做生意、一邊創造社會效益。消費者畀錢買服務，同時都係做緊善事，呢個就係我想見到嘅double impact。」

回想疫情爆發不久後，「體育係」推出「樓下精神」計劃，走入公共屋邨，以Silent Disco形式，帶領居民戴着耳機在公共空間運動。「當時大家困喺屋企，我哋諗住將運動帶返落地。」

「樓下精神」計劃，將音樂與運動帶入公共屋邨。

少數族體育培訓配對就業

//打破男仔做外賣女仔快嫁人的觀念。//

Tina說：「外面人睇到好似一班人喺度跳舞，其實每個人聽嘅音樂唔同，保持距離又有互動。嗰陣真係見到運動嘅力量——佢唔止強身健體，仲可以醫『心』。」Tina強調：「創新唔一定要用科技。最重要係你用同一樣工具，做出唔同嘅影響。」

疫情後，「體育係」繼續延伸「運動共融」理念，推出「積少成多」計劃，協助少數族裔青年透過體育培訓與就業配對融入社會。「以前啲人覺得男仔就做外賣，女仔叻就做老師，唔叻就快啲嫁人。我哋希望打破呢種觀念。」

「積少成多」計劃協助少數族裔青年，從運動中找到自信與夢想。

【支持全運】

港人重新理解運動意義

談到今屆全運會在港舉行，Tina顯得格外興奮。「我仲記得十多年前，香港曾經爭取辦亞運，但因社會氣氛唔支持而擱置。今次全運會真係一個里程碑，因為市民第一次可以喺自己屋企樓下睇比賽。」她認為，這次全運會讓香港人重新理解運動的意義。「當你見到運動員喺你身邊努力，感受係完全唔同。運動帶嚟嘅唔止係經濟效益，而係團結同自豪感。」

體育評述員Keyman是Tina的團隊夥伴。

Tina對啟德體育園的落成亦充滿期待：「我由佢地基動工就開始睇，見到依家正式啟用，真係好感動。香港以前嘅體育設施永遠係『負200』，而家終於補返條數。依個地方，代表香港嘅體育正式有咗家。」她笑說，近年自己也迷上了渡海泳：「疫情嗰陣乜都封晒，得個海仲開，我就開始游海。依家見到三鐵比賽喺中環海邊舉行，真係好標誌性，代表香港人同大自然嘅新連結。」

身處啟德體育園，黃婷說：「香港體育人有一個家。」

【印象深刻】

追夢南亞女生入讀教大

Tina想起「積少成多」計劃其中一位參加者——一名來自巴基斯坦家庭的女生，愛打cricket、又外向健談。「我哋畀佢機會做MC、做活動統籌，仲幫佢寫推薦信。後來佢入咗教育大學，最近仲上咗報紙封面故事。」

Tina眼中閃着自豪的光：「見到佢哋搵到自己嘅夢想，就覺得好感動。喺運動場上，無論背景、語言、宗教，大家都係平等嘅。呢個，就係體育最美嘅地方。」

學員奮鬥自強，Tina感安慰。

【創業之外】

從跳繩推手到總會主席

除了創業，Tina亦是香港跳繩總會主席。「跳繩係一項最貼地嘅運動，成本低、地點要求少、健康效益高。最重要係佢可以畀年輕人發揮創意，唔一定要係精英運動員都可以閃耀。」

她坦言，這幾年投入的時間比自己正職還多，「但見到香港選手喺國際比賽得獎，就覺得好值得。」

【一路走來】

唔一定要贏先至有意義

採訪的尾聲，Tina認真地說：「『體育係』嗰個『係』字，人字邊，代表連繫。體育可以連繫人、社區，甚至文化。佢唔一定要贏先至有意義，而係打開對話、彼此理解嘅橋樑。」

她笑說：「我成日覺得自己唔係做運動嘅人，我係用運動做人。」這句話，也正好總結了她一路走來的信念——讓體育不止是一場比賽，而是一場屬於所有人的人生運動。

體育有助打開對話，建設溝通橋樑。