(荃灣葵青離島)小學生研長者App 東望西望就一撳搜查

在六月尾於愉景新城舉行的創科展覽上，中華基督教會全完第二小學的學生，展出一項針對長者需要的創新設計——名為「『耆』方便」的手機應用程式。這款App由學生團隊自主構思與開發，希望整合葵涌區長者常用的醫療、膳食及休閒資訊，提升資訊獲取效率，協助長者安享便利生活。

出發點好簡單，就係希望幫到長者，令佢哋生活方便啲。—創意小隊

觀察社區+成員經歷 望助長者便利生活

「點解我哋會做呢個App？其實出發點好簡單，就係希望幫到長者，令佢哋生活方便啲。」張渝亨說。小隊成員觀察到，社區資訊分散，要長者四出查找資料並不容易，尤其是行動不便或不熟悉科技的一群。「我哋諗，不如將一啲實用資訊集中整合成一個App，變成一撳即查，就可以減少佢哋周圍搵資料嘅壓力。」

被問到為何以長者為主要對象，黃允晞坦言，除了見到社區中長者的實際需要外，亦因親身經歷而產生共鳴。「我嫲嫲都七十幾歲，有次出街唔記得返屋企條路，當時我好擔心。雖然最後搵得番佢，但我就諗，如果有個App可以幫佢哋搵資料、聯絡家人，咁就唔使咁無助。」

過程中培養了團隊合作精神。

//寫code時成日出錯，有時係漏咗指令，搞到成個程式run唔到。//

整個開發過程歷時半年，同學們經歷不少挑戰。李鎧圖笑言：「寫code時成日出錯，有時係漏咗指令，搞到成個程式run唔到。我試過因為資料亂晒而想放棄。」幸得老師從旁鼓勵，他們逐步找出錯誤，再重新整理程式邏輯，最終成功完成作品。

「我哋主要靠自學App編程，唔識嘅就睇網上教學片，老師都會畀意見或者解釋技術原理，幫我哋釐清方向。」張渝亨補充。

有App在手，方便搜尋長者常用資訊。

//最後決定喺社區中心電子屏幕同步顯示資料，方便唔慣用手機嘅長者。//

團隊合作方面亦有不少磨合。何詩瑩分享：「有次討論時出現分歧，有人話直接放QRcode比長者scan，有人覺得應該唔使下載App，提供資料就夠。最後大家傾出一個方法，就係喺社區中心電子屏幕同步顯示資料，方便唔慣用手機嘅長者。」

團隊期望，日後可將App推廣至更多地方，例如不同區域的社區中心，甚至擴展至九龍區。他們亦計劃加入新功能：「例如預約社區服務，加埋英文介面，等外籍長者都可以用得方便。」

一撳即查，慳返時間歎杯茶。

【副校有Say】

培養同理心最重要

談及自己成長的社區，幾位同學不約而同形容葵涌邨是個多元共融的地方。「好多唔同背景嘅人生活喺呢度，有時啲非華裔街坊會問路，但語言不通會有困難。」這些觀察亦加深了他們對資訊無障礙的關注，激發出更多關心社區的創意想法。

「無論係準備過程定係展覽當日，佢哋都好投入同認真，學生肯踏出第一步，主動去向路人推銷佢哋嘅產品，真係好值得讚！」陸雪瑩副校長笑言。她認為對學生來講，這次經驗十分寶貴。「佢哋唔單止學識咗點樣寫程式，仲喺準備過程中培養咗團隊合作精神同創新能力，最重要係學識同理心，識得關心同愛護社區。」

設計「耆方便」過程中，大家裝備了不少知識，故可以具自信地介紹產品給不同的人。