(西貢)型在起跑線 贏得唔怕遲 一家老友記三重奏

在香港，90多歲仍然跑步參賽，對不少人來說難以想像。2025年，三位來自同一家庭的長者在世界壯年運動會中為港奪得銀牌，分別在W90、M85及W80組別取得佳績。他們是92歲的藍楊佩芳、89歲的楊智堅，及83歲的溫麗城，平日住在將軍澳，亦是在社區跑道上培養出跑步習慣的一家人。

開心就能醫百病！ —三位老友記

//退休後同屋企人跑，精神好多又覺得好好玩，就keep住做。—楊智堅//

談起跑步的開始，三人不約而同提到「家庭」。楊智堅回憶，大約10年前，女兒帶他們到將軍澳附近的運動場嘗試跑步。「退休之後有啲空閒時間想郁吓，同屋企人一齊跑，又覺得幾好玩。」起初只是陪伴家人，後來卻慢慢成為生活一部分。堅持下來，並非單純為了陪子女。「始終都係為自己身體健康，而且又覺得個人會精神好多，又覺得好好玩而去keep住。」楊智堅說。對他們而言，跑步從來不是訓練，而是一件「好玩」的事。

2025年，他們遠赴海外參加世界壯年運動會。楊太溫麗城形容比賽經驗：「特別開心！覺得好好玩，出外比賽又可以見識吓！」他們亦一直強調以安全為先：「我哋通常都係以安全為主。如果跑得好好但係唔安全，都冇用。」

//就算冇乜時間或者天氣惡劣，我哋都會喺屋企玩吓八段錦。—藍楊佩芳//

日常訓練並不複雜。一家人每星期相約到將軍澳海濱長廊拉筋、跑步；天氣不好時，則在家中活動。家姐藍楊佩芳分享：「就算冇乜時間或者天氣惡劣，我哋都會喺屋企玩吓八段錦。」多年來，運動早已成為她的生活習慣。

問及有沒有想過放棄，三位長者異口同聲否定。溫麗城解釋：「因為我哋都唔係做得好激烈，覺得好好玩嘅時候，就唔會覺得辛苦。」跑步帶來的收穫，亦不只在獎牌上。楊智堅直言：「開始跑步之後，心情會變得開心好多。我成日都話，開心就能醫百病！」

//做運動平時都係同老公一齊做，所以覺得好開心好幸福。—溫麗城//

對溫麗城而言，運動的價值在於陪伴。「做運動平時都係同老公一齊做，所以覺得好開心好幸福。有陪伴！」跑道亦成了一家人相處的空間。教練駱雪儀形容：「玩吓又多一個人，然後就一家人一齊做。」

【教練有Say】

安全持續運動 對社會都有益

活躍的運動生活亦帶來不少趣事。藍楊佩芳笑說，當別人知道她90多歲仍跑步參賽時，往往感到驚訝，「搞到我都面紅」。駱教練亦記得，有小朋友曾問：「呢個婆婆喺度跑步得唔得㗎？」她心裡想的卻是：「睇你90歲嘅時候仲跑唔跑到？」

家人對他們高齡參賽亦十分支持。「我哋囡囡其實都係醫生，所以就算有咩受傷或者不適，都可以直接問佢。」有專業意見作後盾，讓他們更安心。駱教練亦常向家屬提出一個問題：「你想帶你屋企嘅老人家去公園定係醫院呢？」她認為，安全而持續的運動，對個人和社會都有益。

這支「家庭隊」以行動打破年齡界限，展現「運動永不嫌遲」。