(荃灣葵青離島)手語傳譯緣 半甲子滿是無言感激

「我只可以同自己講，盡力啦，聽到幾多就譯幾多。」殯儀館內，手語傳譯員唐妙蘭站在聽障家屬旁，一邊聽着喃嘸師傅唸誦經文，一邊把內容譯成手語。由先人的籍貫、生平，到買水、行橋等傳統儀式，不少字詞她都是第一次接觸。儀式開始前，她已向家屬坦言，未必能完全掌握每句經文，對方只回答：「得，冇問題。」

其實嗰份想幫人嘅熱誠，到依家我都記得，嗰種感覺係好滿足。—唐妙蘭

師傅唸完一段經文，家屬便提燈行橋，唐妙蘭亦一路跟着、一路傳譯。「籍貫、出生地嗰啲，我都譯到；但去到經文入面一啲字眼，我只可以靠自己理解，再用手語講返出嚟。」事前，她只知道這是一場傳統道教喪禮，能做的準備，是先問清楚先人的籍貫和背景。「嗰刻真係冇得驚。都係嗰句，盡力啦，問心無愧就得。」

//（當初）搵一份NGO嘅工作，結果誤打誤撞加入咗聾人自助組織。//

早前，香港聾人福利促進會在荃灣舉行「香港手語日2026」，投身手語傳譯近30年的唐妙蘭亦在活動上分享工作點滴。她笑言，自己當初並沒有立志入行。「我只係想轉工，搵一份NGO嘅工作，結果誤打誤撞加入咗聾人自助組織。」

求學時期，她曾上過手語班，惟畢業後已忘記大半，入職時幾乎要從頭學起。教她的，正是一班聽障會員。「嗰陣時我乜都唔識，佢哋就坐喺大堂，用一張紙、一支筆，一個手語、一個手語咁教我。其實係雙向學習，我喺佢哋身上都學到好多嘢。」

剛轉做傳譯員時，她曾協助一名單親聽障媽媽租屋。「好辛苦先搵到樓，大家都好開心，點知一個月後佢獲編配公屋。上期、按金已經畀咗，我就去問業主可唔可以退返；但在商言商，業主話唔得。」

多年來陪伴聽障人士面對生活中的大小事情。

//第一次見面都要花時間交流，了解對方點樣表達。溝通，始終最重要。//

未能替對方取回款項，她難過得哭起來，聽障媽媽反過來拍拍她的手，叫她不要介懷。其後社工告訴她，社署有津助可作補貼。「嗰次對我嚟講係一次失敗，但亦令我經一事、長一智。沉澱落嚟再諗，其實嗰份想幫人嘅熱誠，到依家我都記得，嗰種感覺係好滿足。」

近30年來，她認識了不同聽障朋友，也成為不少會員信任的人。「你識佢哋嘅語言，佢哋會當你係朋友，屋企事、工作事都願意同你分享。就算識手語，第一次見面都要花時間交流，了解對方點樣表達。溝通，始終最重要。

唐妙蘭在台上分享多年來擔任手語傳譯員的難忘經歷。

【科技進步 角色崗位有所不同】

社會不斷出現新事物，唐妙蘭也見證着溝通工具的轉變。「以前靠Fax。我試過傳真俾一位聾人，叫佢第二日記得嚟，我企喺度等到天荒地老，佢都冇出現。後來先知道，原來佢根本收唔到個Fax。」

由傳呼機到智能電話、文字信息和視像通話，聽障人士如今可以自行處理更多生活事務。「以前可能真係好靠我哋，但科技進步之後，佢哋開始自強。能力做到嘅事，我哋都鼓勵佢哋自己做；去到重要關頭，我哋先提供協助。」

她說，共融未必要從艱深的手語開始。「唔需要一開始就覺得：『我唔識手語，點同佢溝通？』只要你寬容一點，簡單學識打個『早晨』，佢哋已經開心到不得了。」

「香港手語日2026」特設中秋共融市集，讓聽障人士展示才華。