聞西──惜食八寶湯 識環保食得爽

相信人人都想豐衣足食、年年有餘，但我哋又有冇好好珍惜食物呢？記得阿嫲以前經常提醒我要「有衣食」，飯碗一粒飯都唔可以剩，經常食隔夜餸就係唔想嘥嘢。最經典係以前嘅電飯煲煲飯會黐底，為咗唔想浪費，阿嫲會加水將佢煮成「冷飯粥」，再開罐榨菜肉絲，咁就係我細個成日食嘅午餐。資料顯示全球每年浪費食物超過9.3億噸，超過六成即5.7億噸來自家庭層面，每年全球每人平均浪費食物達到74公斤，更令人擔憂嘅係香港每年人均浪費食物竟然高達101公斤，係全球平均嘅1.36倍！

惜食當然要從源頭開始，煮飯無可避免會有用剩嘅食材，有時放入雪櫃之後會唔記得咗，放到變壞就會白白浪費。好嘅習慣係經常睇吓雪櫃有乜嘢先再買，保鮮期有限嘅食物就要盡快用咗佢，好似今期分享嘅食譜「惜食八寶湯」，就係利用團年飯用剩嘅食材，參考鹹湯圓湯底嘅做法而煮成。將蘿蔔糕、芋頭糕放湯，確係一個實驗，都有擔心啲糕會唔會好易散開，最後決定加馬蹄粉打芡，湯變得有承托力托住啲糕粒，安全過關！將廚餘變成美食，就係對自己同家人送上最好嘅祝福！

材料：

紹菜..........................300g

免治豬肉...................200g

冬菇...........................6隻

乾雲耳........................10g

蝦米............................35g

甘筍絲.......................適量

蘿蔔糕或芋頭糕.........適量

馬蹄粉....................2湯匙

水............................1公升

醃料：

油................1茶匙

糖................1茶匙

粟粉............1茶匙

胡椒粉...........少許

調味料：

日式醬油.....2湯匙

蠔油............1湯匙

麻油............1茶匙

胡椒粉...........少許

做法：

1. 準備各樣材料：免治豬肉落醃料拌勻，冬菇及雲耳浸軟切絲，蝦米洗淨印乾水。紹菜切成粗絲，甘筍切片再切成絲，而蘿蔔糕或芋頭糕就切粗粒，芹菜切段或切粒。

2. 蝦米先落鑊，然後落油，開慢火將蝦米炒香。之後放入免治豬肉煎香及炒勻，再落香菇及雲耳。

3. 加入浸冬菇嘅水及清水共1公升，滾起即落紹菜煮3分鐘。放調味料（記得試味呀），再落埋芋頭糕粒及甘筍絲煮3分鐘。

4. 馬蹄粉加熟水開稀，邊攪拌慢慢倒入馬蹄粉水，想杰身啲就加多啲馬蹄粉喇。最後落埋芹菜粒就完成。