聞西──醉香紙包骨 茅台醃出更醇情懷

近排「無處不旅遊」成為城中熱話。本港有好多盛事吸引旅客，不過旅客嘅心意從來都唔容易捉摸，最近睇過一個電視節目，訪問訪港旅客最想去香港邊度玩，竟然有人話要去體驗舊式酒樓，仲係有人推住點心車嗰種。有時覺得遊客更識得發掘同欣賞我哋嘅本土文化，可惜舊式酒樓已經被淘汰得所剩無幾。

消失嘅唔止舊式酒樓，好多傳統點心都成為絕響，之前有網民盤點選出12款消失嘅懷舊點心，包括：紙包骨、網油牛肉、炸糉、豬膶燒賣、牛骨髓、麻蓉包、鮮蝦銀針粉、魚翅餃、雞球大包、西瓜盅、橙汁卷、七彩啫喱，以上你哋又食過幾多種呢？其實食材難覓都係傳統點心消失嘅原因之一，例如以前嘅「紙包骨」係用玉扣紙做嘅，不過酒樓點心師傅話而家根本就買唔到玉扣紙。

今次嘗試整紙包骨，參考其他食譜都係用牛油紙包骨，照跟啦！我用咗新鮮一字排，肉比較多，雪藏嘅金沙骨都可以，記得要泡水半個鐘去除雪味同雜質，醃料用咗沙薑粉同秘密武器茅台酒。我發覺茅台酒嘅醬香味，真係好似神仙水咁能夠大大提升食物嘅香味（如果冇茅台酒可用玫瑰露代替），加埋蒜頭、薑片、蔥同一字排一齊包住炸，唔係講笑，剪開牛油紙嗰刻香氣撲鼻。雖然整嘅過程要花啲時間心機，不過都係值得嘅！

材料：

10件一字排.......................700g

薑片...................................20片

蔥........................................適量

蒜頭...................................10粒

牛油紙...............................10張

油.....................................1湯匙

醃料：

生抽........................................1湯匙

粟粉........................................1湯匙

黑醬油....................................1茶匙

沙薑粉....................................1湯匙

糖............................................1茶匙

茅台酒或玫瑰露...................1/2茶匙

胡椒粉.................................1/4茶匙

鹽.........................................1/4茶匙

做法：

1. 一字排洗淨後用㕑紙印乾，避免稀釋醃料，然後落醃料拌勻，再加1湯匙油拌勻醃半個鐘。

2. 蒜頭拍扁、薑切片、蔥切段備用，醃好嘅一字排加入蒜頭及茅台酒拌勻。

3. 牛油紙剪成足夠包起一字排的大小。將排骨、兩片薑及適量蒜頭、蔥段放喺牛油紙上然後包好。

4. 易潔鍋落油，份量大概浸過紙包骨嘅3/4。用中細火加熱，先炸牛油紙簿身嗰邊，然後反轉再炸，每邊大約炸10分鐘。肉比較厚可多炸5分鐘，小心控制火候避免炸燶，最後夾起等無咁熱就剪開牛油紙上碟。