聞西──鍋貼小棠菜 整好腐皮冇負評

經常都聽到好多家長嘅心聲，每日餵小朋友食飯都充滿挑戰，年紀細嘅就坐唔定，含住啖飯死都唔吞，大少少嗰啲就揀飲擇食，要佢哋食菜難過登天！諗起細個嗰陣，屋企連埋我共五個細路仔，每餐飯都充滿競爭性。好彩我天生鍾意食白飯及菜，唔會同其他兄弟姊妹爭餸食，阿嫲都讚我好乖肯食菜菜。

不過，有一種菜連我阿嫲都嫌棄，佢就係小棠菜，阿嫲成日話小棠菜唔好食，因為覺得佢有啲澀及苦味，就係咁我一直對小棠菜都好有戒心。有次偶然同菜檔姐姐提起，佢叫我唔好貪大棵，小棠菜愈細棵愈好食㗎，就係咁一試便知龍與鳳，果然清甜又有菜味！小棠菜除咗白灼或者蒜蓉炒之外，仲可以點整？今期不如一齊試吓整個「鍋貼小棠菜」啦。

呢個餸都係屬於瀕臨絕種嘅古法粵菜，由於比較花工夫時間，而家都唔係咁多地方食到，材料唔算多，有墨魚膠、小棠菜、腐皮、加埋個脆漿。兩塊腐皮夾住啲撈咗小棠菜粒嘅墨魚膠，再上個脆漿就可以慢慢煎脆佢，而家為咗更快出菜，多數酒樓會先蒸後炸。煮呢個餸最重要係將小棠菜灼熟之後要徹底扭乾水份，煎嘅時候就唔會出水，亦可以保持菜粒脆身。至於個厚度就自己決定啦，我認為薄身比較好食，厚身煎嘅時候容易掌握，各有各好！外邊脆、裏邊彈牙、菜粒爽口，就係呢個餸吸引之處。

材料：

小棠菜半斤、墨魚膠半斤、甘筍30g、腐皮1塊、炸漿粉50g、水50ml

調味料：

胡椒粉1/4茶匙、鹽1/4茶匙、粟粉1/2茶匙

做法：

1. 小棠菜切去菜葉，洗淨出水2分鐘撈起，隨即冲凍水降溫。準備乾淨毛巾，放上小棠菜包好，跟住好似扭毛巾咁將啲水份扭晒出嚟，然後切碎，甘筍就切成幼粒。