聞西──芋頭赤肉羹 口感高分 暖胃爆燈

作為一個為食嘅人，天氣開始轉涼第一時間梗係諗到食啦，正所謂不時不食，夏天開恆冷氣打邊爐固然係爽，但點都唔及天寒地凍打邊爐嗰種暖笠笠嘅幸福感覺，仲有蛇羹、羊腩煲、煲仔飯……我覺得呢啲餸都係冬天食先至有意思嘅。過往有段時間每逢十二月我都會去台北走走，浸溫泉、行夜市、食麻辣火鍋……更加吸引我嘅喺街頭小食攤檔，有時太凍會飲碗四神湯暖身，行到攰又可以食碗肉羹補充體力。對遊客而言，呢啲街頭美食更勝山珍海味囉。

肉羹係台灣相當受歡迎嘅傳統小食，有啲似香港嘅碗仔翅，都係杰杰哋嘅口感，或者肉羹因為濃稠嘅質地無咁容易變凍，而且感覺比較飽肚暖胃，所以冬天食就更加合適喇。台灣肉羹材料豐富、味道又多變，有啲仲會加入麵食例如米線、冬粉、粄條等，一般做法可以分為三大類：1）豬肉外層包魚漿，2）豬肉條上一層地瓜粉，有種軟滑帶嚼勁嘅口感，3）豬肉條上一層地瓜粉，先炸後煮形成另一種軟滑嘅口感。

肉羹有種古早味，味道來自香菇、油蔥酥（炸乾蔥頭）及鰹魚片，豬肉嘅部位最好用梅花肉、豬後腿肉，或者隨自己喜歡嘅部位。剛好屋企有芋仔，咁又試吓加埋一齊食都幾得意。

材料（二人分量）：

豬肉...........250g

甘筍...........50g

罐頭冬筍...........150g

醃料：

豉油...........1湯匙

蠔油...........1湯匙

糖...............1湯匙

鹽............1/4茶匙

胡椒粉.....1/4茶匙

油蔥酥..............6g

水.................40ml

做法：

1. 芋仔隔水蒸15分鐘，攤凍後去皮切件。豬肉切成粗條狀加入醃料拌勻，再分二次加入地瓜粉拌勻（如果太乾可加少少水），確保粉漿包住每條肉條。

2. 香菇浸軟切絲，甘筍及冬筍同樣切絲。一公升水煲至微滾，將肉條逐條放入滾水，留意等層地瓜粉皮定形之後先可以輕輕攪拌，肉煮熟後撈起，湯則保留備用。

3. 落油先炒香香菇絲，隨後加入甘筍絲及冬筍絲炒勻。倒入灼肉嘅湯煮至滾起，再落油蔥酥、胡椒粉後落鹽調味。

4. 馬蹄粉用兩湯匙水開成漿，跟住邊攪拌邊落馬蹄粉漿，煮至湯變濃稠就可以將豬肉條回窩，然後加入蛋漿攪拌成蛋花。鰹魚片整碎後放落肉羹拌勻，最後加入芋頭就完成喇，亦不妨加芫茜、胡椒粉、黑醋拌食。