聞西──日式咖喱湯 多菜多肉食清光

大家去日本旅行其中一個指定動作當然係食拉麵啦，原來有另一樣食物相比拉麵更受日本人歡迎，佢就係日式咖喱喇。曾經有研究指出，日本人一年就食咗100億份咖喱飯，拉麵都只係得60億碗咋，而且喺日本嘅咖喱飯餐廳竟然有2萬間咁多。

咖喱喺日本發揚光大咁耐，唔同地方都演變咗好多自成一派嘅種類，今次就分享一個來自北海道札幌嘅「湯咖喱」。顧名思義，湯咖喱就係一碗咖喱湯，質感唔會好似我哋平時食日式咖喱飯嗰種咁濃稠，口感比較清爽，有非常濃郁嘅咖喱香味。每家店當然有唔同嘅煮法，但一般都會用上多種香料同上湯做咖哩湯，再加入肉類同時令嘅蔬菜。食嘅時候湯同飯會分開上，食法就好似食沾麵咁用湯匙舀起一啖飯再浸湯。

一般煮日式咖哩都會用到咖喱磗，但煮咖喱湯一定要用咖喱粉，因為咖喱磗裏面加咗麵粉會令到個湯變成汁咁「杰」（竭）㗎。至於咖喱粉我就會推薦日本牌子紅色小鐵罐呢種，佢裏面係由薑黃、香菜、小茴香、紅辣椒等約20至30種香料混合而成，可以話一罐搞掂晒！呢個咖喱湯可以隨喜加任何肉類及蔬菜，材料非常豐富飽肚，少少辣味飲完就全身暖晒！

材料：

雞髀肉或其他肉類..............400g

洋蔥.........................2個約400g

蒜蓉..................................1湯匙

薑蓉..................................1茶匙

蕃茄醬...............................250ml

甘筍......................................1條

薯仔......................................1個

上湯..................................1公升

蕃茜.....................................少許

月桂葉...........................1至2片

南瓜、茄子、紅辣椒或其他蔬菜...............適量

香料：

日式咖喱粉....1.5湯匙

乾羅勒.......1湯匙

做法：

1. 雞髀肉切件，落1茶匙鹽及少少胡椒粉醃15分鐘，之後煎至兩邊金黃，洋蔥去皮後切件，用食物處理器攪碎（唔係打蓉啊）。另外準備蒜蓉及薑蓉。

2. 用中慢火將洋蔥碎、蒜蓉及薑蓉炒至焦糖色後，加入蕃茄醬炒至乾身，然後落香料及蕃茜碎炒勻。

3. 順序加入上湯、薯仔、甘筍、雞肉及月桂葉，煮滾後轉細火煮15至20分鐘。

4. 同一時間將南瓜、茄子、紅辣椒煎熟備用，湯以鹽調味。想咖喱味更濃，可以再落半湯匙咖喱粉，舀適量湯落湯碗。最後將煎好嘅南瓜、茄子、紅辣椒，放上湯面就完成喇。