聞西──沙白雞蛋苦瓜湯 開胃醒神 共享陽光

夏日炎炎唔少朋友都會帶埋小朋友去沙灘玩，除咗同陽光玩遊戲，摸蜆都係一個好熱門嘅活動。記得好多年前，我同朋友喺西貢某個海灘摸到十幾斤蜆，因為樂極忘形就係咁曬到全身甩皮，所以摸蜆時要記得著返件衫、戴太陽帽，做好防曬措施啊。

花甲、蜆、沙白都係街市最常見嘅貝殼類海產，睇落隻隻都差唔多樣。其實佢哋嘅花紋同體積都唔同㗎，蜆嘅體型較細，表面有凹凸不規則嘅花紋，花甲就扁身啲、身形較長，紋理較整齊，至於沙白就體型較大，呈橢圓三角形，顏色及花紋多變，個殼比厚身。而揀靚蜆亦有學問，首先要留意養蜆嘅水必須清澈，太濁表示啲蜆唔新鮮或者有好多泥沙，另外蜆殼緊閉嘅先係活蜆，打開咗即係已經壞死。如果聞到好大陣腥味，即係啲蜆唔新鮮，千祈唔好買呀。

今次介紹嘅沙白雞蛋苦瓜湯，開胃解暑又可以補充精力！沙白除咗價錢經濟實惠之外，因為佢個殼較厚實而且少沙，所以適合用嚟煮湯，除咗苦瓜，仲加咗雞蛋同鹹蛋，下火之餘湯頭會更濃厚鮮香。最後可以加啲芫荽蔥碎同炸乾蔥，潮汕人更會落芹菜、金不換等香葉添，試吓啦，真係好味好多㗎。

材料：

沙白...............500g

苦瓜......1條約250g

豬腱...............150g

雞蛋.................2隻

熟鹹蛋.............2隻

薑....................幾片

芫荽蔥............適量

熱水...........1.5公升

做法：

1. 沙白用鹽水浸一至兩個鐘待吐沙，然後洗刷乾淨（水同鹽嘅比例約100:3.5），苦瓜切片。

2. 豬腱切薄片方便快熟，熟鹹蛋用匙羹壓碎，或者切粒粒都可以。另外準備蛋漿、薑片及芫荽蔥碎。

3. 燒熱鑊落油爆香薑片後，再落苦瓜爆炒去除青味。之後加入蛋漿待凝結，倒入熱水。

4. 水滾落豬腱煮2分鐘，用篩網隔去泡沫，再落沙白及鹹蛋碎，煮至沙白開口湯頭變濃就可以熄火。最後，加入芫荽蔥碎及炸乾蔥就完成。

【小貼士】

大熱天時買番嚟嘅芫荽蔥好容易會變軟，下次遇到咁嘅情況，可以試吓用水浸一陣就會回復精神㗎喇。