聞西──黃金豆腐韓式辣湯 釀鯪魚肉發光芒

鍾意睇韓劇嘅你你你，最近應該同我一樣每星期都好期待「暴君的廚師」最新集數，真係控制唔到一出就立即煲晒兩集，結果又要等到下個禮拜六先有得睇喇！劇情結合愛情、美食、奇幻與歷史，故事講述一個米芝蓮廚師，因為打開咗古書而被神秘力量牽引，穿越到五百年前嘅朝鮮時代，陰差陽錯之下做咗皇上嘅御廚。其間，仲獻上好多現代嘅菜式，當然唔少得甜蜜嘅劇情，同埋古人食咗現代菜式之後嗰種誇張反應都非常爆笑！

有人話韓劇啲橋段套套都差唔多，其實同煮嘢都好相似，材料都係離不開豬牛羊瓜果菜，不過只要你用心煮一樣可以煮出千變萬化嘅菜式㗎！今次分享嘅食譜「黃金豆腐韓式辣湯」就係參考咗劇裡面其中一個出現過嘅菜式「豆腐軟泡湯」。劇中廚師用咗兩片豆腐，中間夾住免治雞肉餡，然後煎香再放入雞湯。

今次揀用韓國硬豆腐，無咁容易散方便處理，炸過之後又好吸收湯汁，外脆內軟口感更佳，內餡用咗鯪魚肉，因為雞肉又炸又煮點都會有啲嚡口。其實每件豆腐只係需要釀少少鯪魚肉，所以有剩嘅用嚟整大大粒鯪魚球，送辛辣麵一流。至於湯底就用返韓國傳統辣湯，想清爽口味嘅可以用返雞湯，芝士嘅分量就隨心啦。記得留返幾條韭菜灼軟佢，用嚟綁住件豆腐做裝飾，你哋屋企班皇上皇子公主見到應該會好開心嘅，哈哈！

材料：

韓國硬豆腐...........1件

鯪魚肉................200g

大豆芽................100g

韭菜....................100g

洋蔥....................半個

芝士碎................適量

泡菜....................適量

蒜蓉..................2湯匙

麻油..................2湯匙

雞湯..................250ml

水......................150ml

醃料：

胡椒粉...........1/4茶匙

麻油.................半茶匙

粟米..................1茶匙

調味料：

韓國辣醬...........3湯匙

韓國辣椒粉.......2茶匙

沙糖..................1茶匙

做法：

1. 鯪魚肉落醃料拌勻，用手來回撻幾次至起膠，洋蔥切絲、大豆芽及韭菜切段洗乾淨，另外準備蒜蓉。

2. 韓國硬豆腐一開二，再切成五至六件，然後每件再切成兩片，用廚紙印乾水分。每片豆腐撲少少粟粉，拎起一片豆腐釀入鯪魚肉（薄薄就得），上面再放一片豆腐輕輕按實。

3. 滾油煮至180度放入豆腐件，炸至金黃香脆撈起攤凍，幾條韭菜灼軟之後用嚟綁住豆腐件做裝飾。冷鍋落麻油、洋蔥及蒜蓉，再開細火慢慢炒香。

4. 加入韓國辣醬炒香，倒入雞湯及水分煮滾，順次序落韓國辣椒粉、韭菜、大豆芽、泡菜及芝士碎。最後，放入豆腐件煮多2分鐘就完成。