聞西——聖誕蘋果金寶 如經歷酸甜人生

臨近聖誕本應充滿開心歡樂節日氣氛，但一場無情大火，令大家都沉浸在悲傷情緒中，包括我在內好多朋友都減少聚餐及娛樂活動，一來心情欠佳，二來係對離開咗嘅居民及受影響嘅家庭一點尊重。不過，每個人嘅情況都不盡相同，有時候見見好友互相傾訴，為負面情緒找個出口都係好事。記住人生無常，我哋更加要珍惜眼前人，所以聖誕節不妨約吓朋友聚會，一齊整吓嘢食輕鬆一下。

講起聖誕當然唔少得肉桂，薑餅人、Mulledwine、聖誕布丁等都有用肉桂調味。肉桂其實係一種香料，亦都係一種藥材，好多人都會覺得肉桂係西方或中東嘅香料，因為大家熟悉嘅肉桂味道都係來自肉桂捲、蘋果派等西式甜點。其實肉桂主要產自中國、越南、印度、印尼等地區，市面上售賣嘅肉桂有分棒狀及肉桂粉，肉桂條適宜用嚟做飲品，浸喺熱飲會散發出淡淡嘅香味，味道唔會太強烈，煮嘢或者整甜品就要用肉桂粉喇。

蘋果金寳係一個好傳統嘅英國甜品，由上下兩層組合而成，下層係用糖及肉桂調味嘅香軟蘋果粒，上層就由牛油、麵粉、糖等混合焗成嘅脆脆。通常都會配雲呢拿雪糕或者吉士忌廉一齊食，一冷一熱、一脆一軟，口感係超正㗎！除咗蘋果亦都可以試吓加入唔同嘅生果，今次我就買咗啲急凍白桃，加埋焦糖化嘅黑糖味道就更加豐富！

蘋果餡材料：

蘋果......................2個

急凍白桃肉........100g

黑糖..................3湯匙

無鹽牛油..............10g

檸檬皮...................1個

檸檬汁...............2茶匙

肉桂粉...............1茶匙

水.......................50ml

金寶脆脆材料：

中筋或普通麵粉...70g

有鹽牛油..............50g

黑糖..................2湯匙

肉桂粉............1/4茶匙

裝飾用材料：

小紅莓及rosemary香草

做法：

1. 先預備金寶脆脆，麵粉加入黑糖、肉桂粉及已切粒冷凍有鹽牛油，拌勻後用手搓勻丶搓散牛油粒，留意唔使太碎，粒狀最好有大有細。此步驟要盡量快，避免手指溫度令奶油融化，之後放入冰箱備用。

2. 準備檸檬皮及檸檬汁，蘋果及急凍白桃肉切粒。中細火燒熱煎pan，落黑糖及水分，慢慢煮至焦糖化（糖水會變杰身及有泡泡），隨即加入牛油炒香。

3. 加入蘋果粒炒至稍為軟身，之後落埋肉桂粉、檸檬皮、檸檬汁及白桃肉，炒至均勻，蘋果餡料就完成。

4. 將蘋果餡料放落焗盤，再從冰箱取出金寶脆脆均勻鋪喺面，放入預熱焗爐200度。上下火焗20分鐘至表面金黃後，取出放上小紅莓及rosemary香草裝飾，亦可撒上糖粉美化。

【小貼士】

有鹽牛油會令金寶脆脆甜味更加突出。另外可以按自己口味加入唔同嘅材料，例如我試過用伯爵茶碎代替肉桂粉。