聞西──擂椒皮蛋茄子多士 味道豐富源自「舂融」

過往港式餐廳喺內地大行其道，甚至乎令好多商家模仿學習，不過時移世易，宜家好多國內自家品牌反攻香港，雖然有部分水土不服好快撤退，但更多嘅做得有聲有色，都好值得本地餐飲業界參考。好似我經常幫襯沙田一間湘菜餐廳，出品經濟實惠但味道及服務一啲都唔馬虎。

呢間餐廳有兩個餸令我食得好開心，第一個就係蓮藕排骨湯，對上一次係喺武漢食過，自此念念不忘。雖然呢個係湖北（鄂）菜，不過冇諗過可以喺香港食到湖北粉糯蓮藕，此蓮藕入口即化，口感好似食緊薯仔，好甜好好味！第二個餸就係今次分享嘅擂椒皮蛋茄子，佢係湘菜中嘅知名涼菜，當地人會用嚟拌飯食或者作為送酒小食。呢個餸嘅重點就係個「擂」字，就係將材料放入個擂缽擂爛擂勻略顯糊狀。老實講，賣相真係其貌不揚，但係食一口之後就欲罷不能！

青椒、皮蛋、茄子呢個組合真係好得意，好似大纜都扯唔埋，但撈埋一齊又幾好食，有燒焦辣椒味、皮蛋嘅獨特味道、蒜頭嘅辛辣味，擂爛晒嘅茄子、燒焦辣椒及皮蛋口感軟糯幼滑，加埋調味酸辣開胃，味道層次豐富！今次將呢個餸配法包食，除咗賣相加分，亦可以成為一個非常特別嘅party小食！

材料：

茄子2條.......................約200g

線椒或者螺絲椒.....6條約100g

糖心皮蛋............................1隻

蒜頭...................................4粒

法包.................................適量

調味料：

陳醋...............................3湯匙

生抽...............................2湯匙

蠔油...............................2湯匙

麻油...............................1茶匙

鹽................................1/4茶匙

做法：

1. 青辣椒洗乾淨用廚紙抹乾，之後用火槍燒焦表皮或用白鑊乾煸至皮焦，又或用焗或氣炸都可以。辣椒表皮燒焦後，再放入凍水降溫然後撕去表皮切段。

2. 茄子切段大火蒸6至8分鐘至軟身。放涼之後用手撕成條狀，皮蛋去切分成8件、準備芫荽碎及蒜蓉。

3. 準備擂缽或者用其他堅固嘅器皿代替，放入青辣椒、皮蛋及蒜蓉擂至糊狀。然後加入調味料茄子、芫荽碎及蒜蓉，亦可加辣椒粉或者紅辣椒調節辣度。

4. 再擂數下令材料及調味拌勻，茄子唔好擂太爛保持口感，法包用橄欖油煎香，就可以連同擂椒皮蛋茄子醬上枱。

【小貼士】

無擂缽可以用其他堅固嘅器皿代替，例如木盤或者石鍋，千祈唔好用碗或者容易爛嘅器皿，以免擂材料時器皿唔受力破爛導致受傷。