聞西──脆香煎肉餅 千變萬化 一招攀頂

真係唔好睇小社交媒體嘅力量。話說前排喺某社交媒體上瘋狂流傳一間元朗冰室肉餅飯嘅食評潮文，被網民稱為「全亞洲最優秀嘅肉餅飯」，老店突然變成網紅名店，連日吸引大量食客跨區慕名而來排隊等食，甚至有網民清晨5點已經喺門口等開門，真係誇張到你唔信！

本人雖然住喺附近，不過要我排咁耐隊食個肉餅飯就免喇。睇返網上真實食評都算正面，睇相都幾吸引，肉餅比較薄身，有燶邊應該煎得幾香脆，煎肉餅薄身啲真係會好食啲，厚身雖然多啲肉汁，但會少咗香脆嘅口感！

要整一塊完美嘅薄身肉餅其實好簡單，就係用一塊牛油紙對摺，中間落少少油，然後放上預先準備好嘅肉球，最後用手掌壓成餅形，就整到一塊厚度平均嘅肉餅，煎嘅時候就會更加靚喇！呢個方法都好方便儲存，可以一次過整多啲放喺冰箱。

煎肉餅真係可以千變萬化，自己整落乜都得。今次示範蝦醬魚仔肉餅同金沙蝦乾肉餅，都係屋企冰箱手到拿來嘅食材。記住煎肉餅四個秘訣，第一：肉要夠肥，瘦肉肥肉比例7：3甚至6：4都得，第二：肉要撻到起膠啲肉唔會散修修，第三：肉餅要薄身，第四：煎嘅時候要落多啲油。

材料：

免治豬肉...............300g

白飯魚乾.................15g

鹹蛋黃....................2隻

蝦米或蝦乾.............15g

蝦醬.....................1茶匙

牛油........................10g

醃料：

蠔油.....................1湯匙

粟粉.....................3茶匙

糖.....................1.5茶匙

麻油.....................1茶匙

胡椒粉.............1/4茶匙

做法：

1. 白飯魚乾及蝦乾浸半個鐘至軟身，免治豬肉落醃料醃半個鐘。

2. 白飯魚乾及蝦乾分別切粒，鹹蛋黃隔水蒸15分鐘，然後用叉壓成蓉，慢火落牛油、1湯匙蒜蓉及鹹蛋黃蓉慢慢炒成金沙。

3. 將醃好嘅免治豬肉分成兩份，一份落白飯魚乾、蝦醬，另一份落蝦乾及金沙醬。

4. 用手將免治豬肉撻至起膠，然後搓成2個肉球。再按上文提及嘅方法壓成約5mm厚嘅肉餅，煎pan落多少少油，將肉餅煎至兩邊金黃。