聞西──竹報平安 百花釀出「笙」機勃勃

話咁快就嚟過農曆新年，又點少得食個好意頭嘅團年飯同開年飯呢！好多朋友仔怕麻煩又或者唔想長輩煮得咁辛苦，都會選擇出街食，限時限刻就梗係㗎喇，食套餐亦都係必然嘅事。煩就煩在拎起個餐牌一頭霧水，啲餸全部改晒啲好意頭餸名，咩大吉大利、龍精虎猛、年年有餘等等，有時個餸上到枱先知係乜東東，都幾搞笑呢！

自己煮團年飯開年飯一樣可以為菜式改個好意頭嘅餸名，好似今期為大家準備嘅賀年菜「竹報平安」，「竹」字代表咗主要材料「竹笙」，同音字「足」亦有富足嘅寓意！咪就係「百花釀竹笙」囉。竹笙其實同竹無任何關係，佢係一種菌類，我哋平時食嘅竹笙都係乾貨，揀竹笙千祈唔好貪白，太白嘅可能經過漂白加工。至於部分竹笙聞起嚟會有少少酸酸味道係正常嘅，如果氣味太濃或有刺鼻藥水味就唔好買喇！靚嘅竹笙顏色係偏黃白，茹柄（即菌柄）及傘群（即菌裙）要完整，唔會太乾及有彈性為佳。如果做釀竹笙，就要買大隻啲嘅。

蝦膠可以自己打或者買現成嘅，今次加咗少少髮菜攞個「發財」意頭，釀花膠入竹笙最好有整蛋糕用嘅唧袋就容易好多，冇嘅話可以用保鮮袋代替都得。至於個汁因為聯想到竹嘅綠色，所以用咗菠菜汁調色，加埋飛魚子出嚟嘅效果真係好靚呀！竹笙含低熱量及高纖維，係賀年菜健康之選，呢個餸步驟雖然有一定難度，不過長輩食得健康開心，一家人都開心啦！

材料：

竹笙（要大size)........................6條

急凍蝦仁....................................230g

菠菜............................................2棵

髮菜（唔落都得）.....................1g

薑................................................2片

飛魚子及芫荽（裝飾用）.........適量

醃料：

粟粉..............1茶匙

鹽..............1/4茶匙

麻油..........1/4茶匙

胡椒粉......1/8茶匙

做法：

1. 竹笙用水浸15分鐘、略略清洗後揸乾水分，切去頭尾，用廚紙吸乾水備用

2. 蝦仁洗淨後用廚紙吸乾水分，最好有啲黏手程度，放入食物處理器打成膠，亦可用刀背拍扁蝦肉再剁碎。髮菜浸軟後，切碎加入蝦膠拌勻，再大力「撻」至起膠

3. 菠菜洗淨切碎，加100ml水用食物處理器打成蓉，再隔渣搾出菠菜汁備用。將蝦膠放入唧唧袋，在尖位剪開少許，小心地唧入竹笙，然後排在深碟，加入約200ml上湯及加入薑片

4. 中大火蒸8分鐘，蒸完將碟內嘅汁倒出，加入適量菠菜汁及粟粉水煮成芡汁。竹笙卷切件上碟，淋上芡汁，最後以飛魚子及芫茜裝飾