聞西──賀年版「老少平安」 赤口滑口 唔使咬牙切齒

繼續分享賀年菜式！今次我將一個極傳統嘅家常菜「老少平安」，加啲心思同創意，變成一個好睇好食兼大人細路仔都啱食嘅賀年菜。「老少平安」呢個餸相信好多人由細食到大，小時候我嫲嫲經常都有煮，除咗因為佢當時差唔多已經無晒牙，鍾意食啲唔使多咀嚼嘅嘢之外，又因為我怕食魚，所以特別喜歡食鯪魚滑（我會叫佢做冇骨嘅魚，哈哈）！除咗老少平安，嫲嫲仲會用鯪魚滑整鯪魚球生菜湯，或者煎鯪魚餅炒菜芯呢啲價廉物美嘅家常菜。

繼續分享賀年菜式！今次我將一個極傳統嘅家常菜「老少平安」，加啲心思同創意，變成一個好睇好食兼大人細路仔都啱食嘅賀年菜。「老少平安」呢個餸相信好多人由細食到大，小時候我嫲嫲經常都有煮，除咗因為佢當時差唔多已經無晒牙，鍾意食啲唔使多咀嚼嘅嘢之外，又因為我怕食魚，所以特別喜歡食鯪魚滑（我會叫佢做冇骨嘅魚，哈哈）！除咗老少平安，嫲嫲仲會用鯪魚滑整鯪魚球生菜湯，或者煎鯪魚餅炒菜芯呢啲價廉物美嘅家常菜。

傳統嘅老少平安材料有豆腐，鯪魚滑、蛋白，加入調味全部混合攪拌後，再隔水蒸十分鐘左右，最後加啲蔥花芫荽熟油豉油就搞掂。當然亦有唔少嘅變奏版本，例如加入半肥瘦豬肉，蝦米、香菇，陳皮等等。如果講究嘅話，可以買新鮮鯪魚起肉再剁成鯪魚蓉，加生粉同水反覆撻至起膠成魚滑。我就無咁講究喇，街市超市都有現成鯪魚滑賣，夠晒乾淨俐落。

今次嘅賀年版老少平安，用咗日式腐皮釀入魚肉豆腐餡，外形就好似一個脹卜卜嘅荷包，非常好意頭！為咗口感更加幼滑，我改用玉子豆腐代替一般豆腐及蛋白，再加埋黑松露醬調味就更加矜貴啦！仲有個小驚喜就係加咗鵪鶉蛋，就好似懷舊鵪鶉蛋燒賣咁，細細個蛋黃又滑又香，鵪鶉蛋可以先烚熟或者生蛋直接放入腐皮包內都得。

材料：

玉子豆腐...............200g

鯪魚滑..................150g

日式腐皮..................8片

鵪鶉蛋.....................8隻

韭菜.......................適量

蠔油.....................1湯匙

麻油.....................1茶匙

粟粉水...................小量

食用金箔................適量

醃料：

蠔油.....................1茶匙

粟粉..................1/4茶匙

糖.....................1/4茶匙

胡椒粉..............1/8茶匙

做法：

1. 鯪魚滑加入醃料，用匙羹拌勻再「撻」至起膠，玉子豆腐用匙羹壓碎、韭菜輕輕灼軟備用。

2. 將玉子豆腐碎陸續加入鯪魚滑拌勻，然後加入黑松露醬再次拌勻。

3. 輕力將腐皮打開，釀入適量魚肉餡料，留意預留空間放入生鵪鶉蛋，之後封好腐皮口，再用一條韭菜綁好。

4. 腐皮包隔水蒸10分鐘，蒸完將碟內嘅汁倒出，加入適量水分共200ml，加入蠔油、麻油及粟粉水煮成芡汁，腐皮包上碟。最後淋上芡汁，灑上適量食用金箔裝飾。