(沙田)小小校舍 鋪設多元未來之路

馬鞍山在發展成新市鎮之前，曾是東南亞最大規模的鐵礦場之一，不少家庭在山上生活，孩子在礦區成長。馬鞍山聖若瑟小學正是在這段歷史中誕生，70多年前為礦工子女提供教育，是區內最早的小學之一。隨着社區發展，學校遷至現址，至今將踏入40周年。現任校長楊翠珊在校服務第12年，一直陪伴學生走過成長路。

一個小小機會，真係可以改變一個人嘅方向。—楊翠珊

//未必一開始叻，但可以慢慢搵到自己做得到嘅地方。//

投身教育近30年，楊翠珊走上教育路，源於一段親身經歷。出身基層，小學成績不理想，升中後一度難以適應。「有老師肯用自己時間幫我溫習，同我準備考試，一路陪住我。」她說。慢慢適應後，她開始明白老師的角色，「嗰陣先覺得，原來老師真係可以幫到人。」

任教初期，她多在屋邨學校服務。「因為自己喺嗰啲環境長大，比較明白小朋友。」她說，「有啲小朋友未必係唔叻，只係未搵到自己方式。」她亦體會到，「除咗家庭，其實學校對小朋友嘅影響好大。」因此，她一直相信，每個學生都有自己的步伐，「未必一開始叻，但可以慢慢搵到自己做得到嘅地方。」

戴上面罩、舉劍對練，學生在節奏之中學會專注與自律。

//有啲活動我自己以前都未接觸過，但都想畀小朋友試。//

學校位於恆安邨，校舍不大，但資源不斷擴展。現時開設超過60項活動，涵蓋體育、藝術及音樂，讓學生接觸不同範疇。「有啲活動我自己以前都未接觸過，但都想畀小朋友試。」楊翠珊笑言，「例如劍擊、音樂，相關器材都幾貴，有啲家庭未必負擔到，但透過學校搵資助，小朋友都有機會可以試。」

談到最深刻的學生，她提起一位畢業生。當年在校接觸音樂，「最簡單係拉小提琴」，卻因此找到興趣。之後升讀中學，他繼續自學，最終到澳洲發展音樂事業，更成為大學助理教授。近年，他回到母校演出，「佢話想返嚟，多謝當年學校畀咗佢一個機會。」楊翠珊說：「原來一個小小機會，真係可以改變一個人嘅方向。」

球枱旁的安靜與等待，成為另一種學習。

【走入社區學習 價值觀教育在生活細節】

在楊翠珊眼中，學校從來不只是教學的地方，而是社區的一部分。「我哋都係馬鞍山一分子，小朋友每日喺呢度生活，如果只係返學放學，其實唔會真正了解自己住緊嘅地方，所以我哋會帶佢哋由細開始認識身邊環境，明白社區點樣運作。」

楊認為，價值觀教育往往來自生活細節。「例如去公園，我哋會提醒佢哋唔好亂拋垃圾、唔好太嘈，因為人哋仲休息緊，呢啲都係學識尊重他人，同人相處。」隨着成長，學生會逐步走入社區。「我哋會安排探訪老人家、做賣旗等活動，唔係淨係完成任務，而係希望佢哋明白，自己同呢個社區係有關係，亦可以為其他人出一分力。」

疫情期間，學校亦開放校園作疫苗接種及選舉場地。「學校唔應該只係一個讀書嘅地方，而係可以同社區一齊用，希望小朋友知道，自己唔只係喺度生活，而係呢個地方入面嘅一分子。」

楊翠珊在校服務第12年，投身教育近30年，與學校一同成長。