聞西──泰脆柚子沙律 快趣食出層層口感

近排有個電視烹飪節目，某位名廚示範菜式時，將其中一樣材料「羅勒」全程講錯咗做「紫蘇」，隨即有觀眾電視截圖喺Facebook留言：我究竟睇咗啲咩？basil定紫蘇呀？兩樣嘢嚟喎！媽我好亂呀！好日唔開電視，一開電視就滾！亦有人留言：主持唔問、撰稿唔問、導演又唔問，後期製作又唔問，係咪真係覺得冇問題呢？最搞笑就係呢個留言：不用分那麼細，都係綠色（大笑中）。

上網翻查資料：原來羅勒係其中一種唇形科植物，其實好多有香味嘅植物都係屬於唇形科嘅其中一員，包括薄荷、薰衣草、迷迭香、紫蘇等等。最先發現羅勒嘅地方原來係印度，不過佢哋唔係用嚟食，只係會用羅勒供奉神明。羅勒開花之後，花序會好似寶塔咁一層層咁生長，所以台灣人會叫羅勒做九層塔，潮州人又會叫羅勒做金不換，以示非常珍惜！佢亦都係炒薄殼必要嘅香料。西方人煮意粉經常用到嘅青醬就係羅勒，葉比較圓，東南亞菜式常用嘅九層塔/金不換則較細長，味道亦會較濃烈，記住就唔會買錯！

天時暑熱，最啱食個重口味又冰冰涼涼嘅沙律。今次用中式手法去做泰式柚子沙律，將銀魚仔及蝦米炸脆，連同炸乾蔥及雜錦果仁製造出香脆嘅口感，主角當然係金不換葉，強烈嘅味道貫穿整個沙律！留意作為一個泰國沙律，辣一定必不可少。如果要走辣，我情願你唔好食喇！

材料：

泰國柚子............500g

乾蔥頭.........4至6個

蝦米仔.................30g

銀魚仔.................15g

雜錦果仁..............50g

金不換葉..............1棵

醬汁材料：

青檸.....................4個

指天椒.................2隻

魚露.................3湯匙

蜜糖.................2茶匙

砂糖.................2茶匙

做法：

1. 青檸切半榨汁，記得隔去青檸核，指天椒切碎，將砂糖及魚露加入青檸汁拌勻。然後，再落埋蜜糖及指天椒碎，並攪拌成醬汁備用。

2. 乾蔥頭切片，用猛火炸到香脆，留意火喉，炸過火乾蔥頭會變苦。嫌麻煩可以買現成嘅炸乾蔥，泰國雜貨舖有售。之後用餘下嘅油將蝦米及銀魚仔炸脆，用廚紙吸去多餘油份。

3. 金不換葉洗淨切碎成絲，雜錦果仁放入密實袋用硬物略略壓碎，柚子去核搣成粒粒果肉。

4. 將柚子果肉放喺碟上面，再按次序落金不換葉絲、雜錦果仁碎、炸乾蔥、炸銀魚仔及炸蝦米。食之前淋上醬汁拌勻。

【小貼士】

柚子最好選擇泰國嘅紅柚，香甜飽滿又多汁，價錢貴少少都值得嘅。超級市場有賣已經起肉嘅泰國柚子，可以慳返