聞西──口水雞卷 圓圓不絕的爽辣

一個疫情改變咗好多人嘅命運，亦改變咗我哋好多生活習慣，其中一個就係儲糧。香港實在太方便，梗有一間超市喺左近（偏僻地方唔計呀），而且雪櫃位置有限，根本唔需要好似外國咁儲糧。不過，疫情出現之後，好多朋友習慣一次過買幾日嘅餸，仲有人會買多個冰箱放凍肉添。

不過請留意，食物放入冰箱唔代表可以永久保存，其實一樣會變壞同過期。有時舊嘅未用完又再買新，喺冰箱深處嘅就會漸漸被遺忘，結果冰箱變成食物墳場（哈），所以希望大家做到冰箱定期檢查、保持循環，亦都要檢討自己嘅採購習慣，避免過度囤積同浪費食物。

平時整口水雞，我都會用冰鮮雞脾，今次咁啱發現冰箱有兩塊雞扒都放咗一段時間，即刻處理咗佢啦。如果要招呼客人，可以將雞扒整成雞卷，賣相會吸引啲。另外，一般口水雞個汁都比較複雜及重口味，我呢個係簡單版，連蒜蓉都唔使落，而為咗配合宜家咁熱嘅天氣，醬汁會加入檸檬汁同薄荷葉，味道因而更清爽。至於辣油，其實可以好隨意，今次用咗花椒辣椒油，會有少少麻辣，如果用有渣嘅辣椒油或者老乾媽，就要預先加落個醬汁拌勻喇。

材料：

急凍雞扒.............................2塊

花生碎.............................1湯匙

白芝麻.............................1茶匙

蔥、芫茜、薄荷葉............適量

花椒辣油.........................3湯匙

青豆............1小碟（可以唔要）

醬汁材料：

日本醬油.....................3湯匙

糖.................................1茶匙

白醋及黑醋............各1湯匙

檸檬汁.........................1湯匙

蒸雞卷湯汁.................3湯匙

醃料：

紹興酒.............2湯匙

鹽.....................1茶匙

胡椒粉................少許

做法：

1. 急凍雞扒解凍後洗乾淨，用廚紙印乾水份，為咗令雞卷外形靚啲，可以切去多餘嘅肉，令雞扒厚度一致。之後，用刀平均喺雞肉上面𠝹開，但唔好切斷。

2. 雞扒落醃料醃15分鐘，然後準備一張錫紙放上雞扒，先用手將雞扒捲起，再用錫紙包實，記住捲嘅時候要畀啲力，越實越好。之後，兩邊再扭實，固定雞卷形狀。

3. 雞卷隔水蒸20分鐘，然後剝開錫紙（保留啲汁做醬汁），將雞卷浸入冰水約10分鐘，再放入雪櫃雪半個鐘備用。蔥、芫茜、薄荷葉切碎，檸檬榨汁，灼熟青豆，準備好醬汁。

4. 由雪櫃攞出雞卷，切成厚片放碟排好，並倒入醬汁。將青豆、蔥、芫茜、薄荷葉逐一撒落碟上面，再撒上芝麻、花生碎，最後淋上花椒辣油就搞掂。