聞西──普羅旺斯燉菜 片片優雅全素惹人愛

身邊總有啲朋友好期望打風放假，對於突如其來嘅假期係開心嘅，但同時亦有好多人喺風球之下照樣要返工，甚至要面對更危險嘅工作環境，例如消防員、渠務署、清潔工人等，一諗到呢度我就情願唔好打風了。

另一個香港打風嘅現象就係盲搶菜。每次打風前夕，大家都會一窩蜂到超市街市掃晒啲菜，唔講以為係世界末日。平時阿媽叫食多啲菜你哋就當耳邊風，到打風先嚟去搶，仲要畀貴二三倍價錢去買，香港人真係有需要改變呢個習慣。

既然大家都咁鍾意食菜，今次就分享一個來自法國嘅烤焗蔬菜菜式「普羅旺斯燉菜Ratatouille」，可以話係法國版嘅雜菜煲，咁當然係優雅好多啦，論賣相真係冇得輸，係一個輕易贏得掌聲嘅菜式。佢重點係個醬汁，而個醬汁嘅主角就係燒過嘅甜椒，亦都係呢個餸嘅靈魂，佢會令個汁有炭燒香味，甜椒嘅味道會更濃郁，好多食譜都會加香料，例如羅勒、迷迭香，我就覺得蕃茜比較夾，唔會太搶冚咗其他材料嘅味道。至於瓜果，都係用夏季當造的，而且要夾顏色，例如紫、紅、黃、綠，切薄片後間住排好，出嚟嘅效果會好靚。雖然洗切嘅準備功夫係多少少，不過保證你會覺得係值得嘅！

醬汁材料：

黄色、紅色燈籠埱各1大個、大肉茄2個、大洋葱半個、蒜頭4粒、蕃茜滴量

時令瓜果：

茄子、綠色翠玉瓜、黃擳瓜1條、唔好太熟嘅大肉茄朋友個

調味料：

美乃滋1湯匙、糖2茶匙，胡椒粉、黑胡椒、鹽各少許

做法：

1. 用火搶燒燈籠埱至焦黑，放落凍水浸一陣，就可以輕易將椒皮除去。除去椒籽後切粒，蕃茄底部𠝹十字，用熱水浸1分鐘，之後剝皮再切粒。

2. 洋葱切粒、蒜蓉剁碎、蕃茜切碎。平底煎pan燒熱落橄攏油，先炒香洋蔥及蒜蓉，再落黄色、紅色燈籠埱、大肉茄及蕃茜，煮到佢哋全部熟晒之後放入大碗。

3. 醬汁材料攤凍少少之後，用攪拌棒打成醬。然後落調味料（按個人口味調教），將部分醬汁倒入焗盤鋪乎〈薄薄一層就可以），茄子、綠色翠玉瓜、黃擳瓜、大肉茄全部切片。

4. 將各款瓜果片交替整齊，排好在焗盤，並在表面掃上香草橄攬油。然後鋪上一張錫紙，用筷子篤幾個窿散氣，放入200度焗爐焗30分鐘，之後拎走錫紙再焗多20分鐘就搞掂。

【小貼士】

屋企冇火槍可以用焗爐代替，又或者放在爐火直接燒焦；美乃滋可以令醬汁更順滑及增加香味。