聞西──鹹魚肉碎炒米粉 櫛瓜切入好口感

周星馳喺電影《少林足球》有句經典對白：做人如果冇夢想，咁同條鹹魚有咩分別呢？或者周先生唔知道，製作一條鹹魚可能比做人更加難，製作鹹魚極之考經驗，不同種類、大小嘅魚要放幾多鹽、醃製幾耐等，都係師傅們年年月月累積落嚟嘅經驗去判斷。鹹魚一般分霉香和實肉兩種，霉香鹹魚醃製過程中會故意讓魚輕度發酵變質，令到肉質變得鬆化及產生一股霉香味道，而實肉鹹魚則以新鮮魚醃製，肉質結實。

過往鹹魚白菜也好好味，可惜現代人健康掛帥，食鹹魚嘅人少咗，入行製作鹹魚嘅人就更加少，喺香港製作鹹魚呢個行業似乎越嚟越難「鹹魚翻身」了。其實，我哋每日都食好多加工品食物，其中含有嘅添加物、化學藥劑一樣有好多致癌風險，正所謂「萬物皆有毒」，樣樣嘢食得太多都唔好啦，最緊要唔好過量。

鹹魚可以煎炒蒸之外，其實都可以化身為調味料。呢個鹹魚肉碎炒米粉睇落好似好普通，食落你就知味道，嗰陣霉香鹹魚嘅獨特嘅風味若隱若現，比魚露更鮮香，加埋剁椒嘅微辣酸味提味，唔食鹹魚嘅你應該都會喜歡。最後，加入櫛瓜絲令口感更加豐富，鹹魚菜式一樣可以好出色！

材料：

炒米粉..............................2塊

免治豬肉.........................300g

霉香鹹魚...........................50g

乾蔥頭..............................2個

剁椒..............................2湯匙

櫛瓜..................................1個

水..................................150ml

麻油或者青花椒油...........少少

醃料：

油1湯匙、糖2茶匙、粟米粉1茶匙、胡椒粉1/4茶匙

做法：

1. 首先準備各樣材料：炒米粉用清水浸泡15分鐘後隔水備用，鹹魚拆肉切細粒，免治豬肉落醃料及鹹魚拌勻，櫛瓜切幼絲、乾蔥頭剁碎。

2. 中火燒熱鑊落油。先爆香乾蔥蓉，然後落免治豬肉，壓成餅型將兩邊煎香，再用鑊鏟整碎。

3. 加入剁椒及清水，煮5分鐘至滾起後加入米粉。之後不斷炒，令米粉完全將湯汁吸收。

4. 加入櫛瓜絲抄勻，轉細火冚蓋煮3分鐘，然後將米粉炒至乾身。最後，按自己喜好加啲麻油，又或者青花椒油提味即可。