聞西──食蔭鳳梨醬燒肉 感恩屋企有米

新聞報道話，重陽節三日長假首日錄得約46.7萬人次出境，創咗通關後出境單日最高數字，其實有乜咁出奇呢？香港人一向都係外向型，有三五七日假期唔出去玩至奇啦！而我都唔例外請多兩日假飛咗一轉台北。

台北一向係我短線旅行嘅首選，個多小時機程真係話咁快就到。落機放低行李即刻食個紅燒牛肉麵，飲杯蜂蜜苦瓜綠茶，正！台灣嘅飲食特色最吸引嘅就係價錢平實，或者疫情之後乜嘢都貴咗，不過計番港紙都係好平易近人，隨時都可以食到飽：滷肉飯、刈飽、四神湯、涼麵、蛋餅、地瓜球、臭豆腐等，講到呢度我又好想再去台北！呵呵……

台北另外一個吸引我嘅地方，就係佢哋嘅傳統市場，最出名嘅當然係「南門市場」。嗰度除咗有蔬菜鮮肉賣之外，仲有南北雜貨，好多地道嘅台灣食材都可以買到，例如金針、鹹菜乾、酸白菜等，都係我每次去必買嘅食材。今次，我買咗一種好特別嘅食材叫「蔭鳳梨」，其實佢係用台灣鳳梨、鹽、糖、豆粕及甘草整嘅醃漬物，聞落好有黃豆醬嘅鹹香味，又有陣陣菠蘿香甜味，都幾得意喎。味道鹹中帶甜唔太鹹，台灣人會用佢嚟煮苦瓜鳳梨雞湯，亦可以用嚟炆肉。今次呢個「蔭鳳梨醬燒肉」，鹹香果香加埋豬油香，真係人間美味！記住呢個餸係唔需要打芡㗎，亦唔可以太乾，要有餸汁撈飯，下次去台北不妨買樽試吓。

酸白菜

鹹菜乾

金針

材料：

五花腩.................500g

炸豆腐.................280g

蒜頭.....................5粒

薑.........................4片

紅辣椒..................1隻

蔭鳳梨..................3件

蔭鳳梨汁.......3大湯匙

生抽....................40ml

冰糖........................5g

做法：

1. 五花腩切件（大約3cm寬），炸豆腐亦切成一口大小，蔭鳳梨切片，蒜頭略拍，芫荽切碎。

2. 材料準備好就開始煮喇。首先燒熱瓦煲落少少油，放入五花腩件煎至出油及金黃，再翻轉煎另外一面，順便落埋蒜頭、薑片及冰糖。落冰糖同肉一齊煎，就會有焦糖化嘅效果，但切忌大火。

3. 肉煎好之後就可以落生抽，稍為煎香就落埋蔭鳳梨件及汁，大約煮一分鐘。

4. 加入500ml水，放入炸豆腐件及紅辣椒，冚蓋慢火炆一個鐘，然後熄火焗半個鐘。最後，煮返熱就搞掂。