聞西──腐乳不驚人誓不休 襯酸菜雞口水流

最近去咗一轉汕頭三日兩夜吃貨之旅，由香港去汕頭高鐵車程只需三個鐘鬆啲，真係瞓個晏覺就到喇！開心今次搵到一間好靚、地點又好嘅民宿「深巷民宿」，距離汕頭食街之稱嘅龍眼南路，不過五分鐘路程，對面仲有間大型卡啦OK中心。原來，呢度會提供茶具畀客人邊唱邊泡功夫茶，真係好有趣！

汕頭第一晚食牛肉火鍋，新鮮牛肉按部位細分，我最鍾意吊龍同胸口油，牛肉味超濃，仲有啲完全未聽過嘅部位，好似匙肉、匙柄、匙仁，簡直係好牛者嘅天堂。第二日，中午食汕頭老字號滷鵝店春梅里，唔係話香港啲滷水鵝唔好食，不過新鮮鵝已經贏在起跑線，肉質鮮嫩、鵝皮有彈性，粉肝、鵝脖簡直驚為天人。鵝肉、鵝翅、鵝掌、鵝胗、鵝紅、鵝腸、鵝肝，全部都好正，味道越食越香濃！

晚餐去咗龍眼南路食打冷，試吓生醃海鮮，海鮮粥、魚飯等，好味但遊客價啦。不過，坐喺街邊食又幾有風味，之後再食甜品，最後買咗腐乳雞翼、炸魚丸做宵夜。臨走午餐又食咗滷水火鍋，鮮鵝肝打邊爐超級好味，汕頭牛丸、墨魚丸唔可以錯過！之後去咗超市掃貨，見到包新鮮酸菜同泡椒，即刻決定買嚟煮酸菜魚，今次用腐乳做調味，做出奶白色嘅濃湯效果，一口酸香真係太好味！弊傢伙，好掛住汕頭嘅美食添……

材料：

雞.................半隻

酸菜.............200g

泡椒...............100

秀珍菇.........200g

薑..................4片

芫荽.............適量

腐乳..............3件

糖...............1茶匙

做法：

1. 雞洗乾淨用廚紙印乾水，落少少鹽醃一陣。秀珍菇去根部搣散，酸菜切件（試味如果太酸可以泡一陣水減鹹），泡椒切段，準備好薑片及芫荽段。

2. 開鑊落油爆香薑片，然後落雞件煎香，再喺鑊邊灒酒。

3. 加500ml水煮滾，然後加入酸菜件，將腐乳用匙羹攪拌成醬加進湯汁，冚蓋煮15分鐘。

4. 加入秀珍菇及泡椒段煮2分鐘，最後落埋芫荽就可以熄火上碟。鍾意食辣嘅話，可以加少少青花椒油，又有唔同嘅風味。