聞西──和風麻婆豆腐 溫和不失火辣香嫩

香港人有幾鍾意食日本菜就唔使多講，另一方面其實日本人都好鍾意食中菜㗎，我上星期去日本福岡旅行嘅時候，發覺當地都有好多中華料理餐廳。咁大家又知唔知，日本人最鍾意嘅中華料理係咩呢？答案就係麻婆豆腐喇！

麻婆豆腐最初係由四川出身嘅廚師陳建民帶到日本，佢算得上係日式麻婆豆腐之父呢。陳師傅針對日本人唔食得太辣及鍾意食較甜嘅口味，而對麻婆豆腐調味作出調整。由於舊時嘅日本好難搵到花椒、豆瓣醬等材料，所以以前嘅日式麻婆豆腐都少用花椒，但就會用蠔油、紹酒，甚至赤味噌嚟調味。到咗近年，日本非常流行正宗四川口味麻婆豆腐，就更引伸出好多唔同味道嘅麻婆豆腐，另外麻婆豆腐醬包及麻婆豆腐丼飯都非常普遍。不過都有人唔太鍾意日式麻婆豆腐，認為太過甜、唔夠辣、個芡杰撻撻等等。

今次分享嘅食譜，就係參考咗日本仙台一款美食「麻婆日式炒麵」，做法就好似我哋嘅肉絲炒麵咁，將麻婆豆腐淋上炸脆咗嘅炒麵。我用炸米粉代替，索汁之後口感會更滑，調味就用咗味噌、味醂、清酒及醬油，口味較溫和而且無咁油膩，而且咁啱我見雪櫃有少少蝦仁，加埋落去又幾好味喎。最後記得撒上日式山椒粉，香麻就係麻婆豆腐嘅靈魂啦，唔少得㗎！

材料：

板豆腐............1件

免治豬肉.......200g

蝦仁.............12隻

蔥...................1棵

薑...................................3片

銀絲炒米粉.............1至2個

木魚碎及乾冬菇絲........適量

麻油及山椒粉................適量

調味：

日本醬油、味醂、清酒各1湯匙，味噌2湯匙

做法：

1. 先準備上湯，300ml熱水加適量木魚碎及乾冬菇浸15分鐘，然後隔渣備用（用現成上湯代替都可以嘅），並將米粉搣開及炸脆。留意米粉炸嘅時候會突然膨脹，一次過落太多就會好難控制㗎。

2. 蝦仁切粒再飛水，然後過冷河保持爽脆口感。豆腐切丁、準備蔥花及薑米。

3. 先爆香薑米，落免治豬肉煎香，再加入味噌爆香。隨後落埋日本醬油、味醂、清酒，加入豆腐粒及上湯，滾起冚蓋煮10分鐘。

4. 加入蝦仁拌勻，試味，如果唔夠鹹可以落鹽調味。跟住打芡及落蔥花，落適量麻油及撒上山椒粉就可以熄火。炸米粉放落碟，最後淋上麻婆豆腐就完成喇。

【小貼士】

用板豆腐煮嘅時候會少啲出水，而且冇咁容易散晒。