聞西──快炒蜜糖欖角肉片 邊煮邊食唔使畀面

最近中午食飯行過中環嘉咸街，成條街人山人海都係遊客，有啲地方仲排晒大隊，唔好誤會佢哋排隊買名牌包包，其實係等緊同啲靚靚壁畫影相打卡，場面都幾有趣！不過對於中環街坊嚟講，嘉咸街絕對係一條民生街，呢度有露天街市、有好多糧油雜貨店、餐飲小店等，多年來照顧住附近嘅居民日常生活。

嘉咸街有一間我好鍾意嘅老店「九龍醬園」。我一直都係佢哋嘅捧場客，因為佢哋堅持傳統生曬，所以成本比超市賣嘅豉油貴好多，好彩仲有好多識貨之人會慕名而來幫襯，時至今日依然屹立不倒！除咗醬油同傳統醬料，佢哋仲有兼賣好多偏門嘅傳統食品同涼果，實在保留住好多上個世紀嘅味道，例如仁稔、酸果，仲有今期嘅主角「欖角」。

欖角係以生烏欖除去核後壓扁，再切成兩半醃製而成，由於成品外形呈三角形，所以有「欖角」之稱。欖角嘅味道好特別，有橄欖嘅清香，又帶啲鹹香氣息，好多時候都會用嚟配肉類，或者加埋豆豉用嚟蒸魚。今次特別啲，我將欖角剁到細碎做醃料，等啲肉盡情去吸收欖角嘅味道同油香，再加番薯粉炸到每片肉都有個黃金外殼，最後仲配埋蒜蓉嘅香添。呢個餸我一路煮一路流口水，真係香到暈，我諗配雞肉都一樣咁好味！

材料：

豬梅肉.........250g

甜豆.........200g

鮮冬菇.........4隻

細紫洋蔥.........1個200g

欖角.........10g

蒜頭.........3粒剁成蓉

番薯粉.........2湯匙

蛋漿.........1湯匙

蜜糖.........1湯匙

生油.........湯匙

做法：

1. 欖角洗淨抹乾後剁至細碎，豬梅肉切厚片，加醃料、番薯粉、蛋漿及欖角碎，用手將上述材料徹底拌勻。

2. 甜豆撕去頂部和尾部纖維，鮮菇切厚片，洋蔥切塊。

3. 熱油將肉片炸至金黃。甜豆、鮮冬菇飛水約1分鐘撈起。

4. 中火熱鑊落油爆香洋蔥、蒜蓉，將肉片回鑊，隨即落埋甜豆、鮮冬菇及1湯匙生油炒香。最後，落1湯匙蜜糖炒勻熄火上碟。