聞西──香椿菇筍滷肉飯 熱辣辣的浪漫

每次去台北我都一定要食滷肉飯，呢碗飯可以話百吃不厭，我會形容佢係台版豬油撈飯，不過滷肉飯嘅味道更加豐富有層次。原來滷肉飯都有分南北兩派，台灣北部嘅滷肉飯會加香料五香粉同肉桂粉，五花腩肉會切成細條，亦會加入豬皮煮出膠質，令滷汁味道更加濃厚。

台灣南部嘅滷肉飯則偏向原味，唔鍾意加香料，利用炸過紅蔥頭嘅油炒香免治豬肉。醬油係主要調味料，同時都係鹹香嘅來源，南部口味偏甜，通常會加多啲糖。不過呢種用免治豬肉煮成嘅滷肉飯，喺南部會被稱為「肉燥飯」，而「滷肉飯」喺南部其實係白飯上面放上一大塊滷五花腩肉，但喺北部又叫「控肉飯」，有時候都會覺得幾混亂啊！

我比較鍾意手切五花腩嘅口感，但調味方面就喜歡南部以醬油為主嘅口味多啲。不過，最吸引人一定係充滿豬油香同醬油鹹鮮嘅滷汁，配上熱辣辣嘅白飯真係令人無法抗拒！自己煮我會貪心啲，加埋鍾意嘅筍絲及冬菇絲，今次再貪心啲落咗香椿醬調味。香椿係一種植物，佢有種好特殊嘅青草香味，我通常會用嚟做快炒、炒飯或者做乾拌麵醬，今次就係第一次用嚟煮滷肉飯，真心覺得效果唔錯，下次會加少少辣椒，應該可以添多幾碗飯，哈哈！

材料：

去皮五花腩肉.....350g

日本乾冬菇絲.......30g

水煮筍................200g

蒜頭.....................3粒

乾蔥頭..................1個

炸蒜酥..................10g

油蔥酥..................20g

調味料：

生抽...........4湯匙

香椿醬........3湯匙

黑醬油........1湯匙

胡椒粉.....1/4茶匙

做法：

1. 五花腩先切片後再切細條，落1茶匙鹽拌勻略醃。冬菇浸軟揸乾水，留起浸菇水後用，筍切細條，預備蒜蓉及乾蔥蓉。

2. 熱鍋落油爆香五花腩條至出豬油，加入蒜蓉及乾蔥蓉爆香。

3. 按序加入冬菇絲、筍絲、米酒炒勻，之後落調味料炒至聞到香氣。

4. 加入炸蒜酥及油蔥酥，倒入冬菇水及清水冚蓋轉慢火煮個半鐘，其間可加水避免乾水。煮好之後熄火試味或以鹽調味，最後將適量滷料及滷汁淋上飯面。

提提你：

炸蒜酥、油蔥酥可以喺街市雜貨店買到。香椿醬就可以喺專賣台灣食品嘅舖頭買到，如果買唔到，就用同等份量嘅生抽代替都可以。