聞西──「嘩蝦蝦」米餅 食嘅幾多歲 都話卜卜脆

後生一輩嘅你，有冇俾阿媽話過「咁大個人都唔嗅米氣」呢一句呢？如果你以為佢囉嗦叫你食多啲飯，咁你真係太年輕了！飲緊奶嘅BB梗係未聞過米香，呢句嘢即係話你天真唔懂事，唔識人情世故囉，咁真係要檢討下自己喇。不過，香港人近年真係唔係「幾嗅米氣」，唔好誤會啊，我咁講係用字面意思：根據工業貿易署統計，2013年平均每名港人全年消耗45公斤食米，但至2021年已經減少到每人37公斤。

我細個嗰陣已經係飯桶，其他兄弟姊妹掛住食餸，我就最鍾意撈餸汁扒飯。阿嫲經常將隔夜飯煮成冷飯粥，然後再開罐榨菜肉絲，如此一鍋一餐既經濟又滿足！的而且確，我屋企長期有冷飯儲備，唔係食唔晒，實情係專登煮多啲，因為長期開OT返到屋企都時間唔早，咁樣做就隨時都有飯食，又可以煮冷飯粥，或者炒個靚飯都得！講到呢度，大家應該估到今期嘅主題就係「冷飯」喇。

將冷飯加入配料再煎成米餅，係我十年前第一本食譜嘅菜式，脆卜卜嘅米餅就好似煲仔飯嘅飯焦一樣咁邪惡咁吸引，要成功令米餅唔散開有以下幾點要注意：（1）一定要將冷飯加熱、（2）加入蛋液、（3）攪伴至起膠、（4）充份按壓、（5）放入雪櫃定型，至於配料就悉隨尊便喇。我今次用咗櫻花蝦及蝦膠，前者煎過香口又脆身，後者可以令米餅更有黏性，呢個雙蝦組合蝦味濃到爆晒燈！

材料：

白飯..........................400g

急凍蝦仁...................150g

櫻花蝦........................10g

蕃茜...........................適量

雞蛋...........................1隻

白芝麻....................1湯匙

做法：

1. 白飯放人微波爐加熱30秒，撒少少鹽拌勻。急凍蝦仁洗乾淨用廚紙乾，然後剁成蝦膠，加少少鹽調味。

2. 蛋糕摸掃油備用，番茜切碎，連同蝦膠、蛋液加人白飯。

3. 用飯殼將所有材料拌勻，並且不斷攪拌按壓至起膠。然後，放人蛋糕摸鋪平按壓成餅型（如果無蛋糕模用手搓成餅型都得），之後平均撒下櫻花蝦及白芝麻，再略略壓實，然後放人雪櫃定型。

4. 將米餅脫摸再切件，燒熱平底鑊落油，逐一將米餅兩面煎至金黃香脆就食得。配埋辣椒醬食，真係冇得頂呀。